Qańtarda oqqa ushqan tórt jasar Aikórkem Meldehannyń ólimine qatysty qozǵalǵan is toqtatyldy. Tergeý organy isti «qylmys quramy bolmaǵandyqtan» toqtatqan, ile shala ony «qupiia» etken.
Bul týraly Azattyqqa búldirshinniń ákesi Aidos Meldehan habarlady.
- Bul masqara ǵoi, sózim joq. Qyzymdy óltirgenderdi tabýdyń ornyna isti toqtatqan, onysymen qoimai isti «qupiia» etipti. Jeltoqsannyń aiaǵynda toqtatypty. Keshe ony estip advokatym aiqai-shý shyǵarǵannan keiin hat jiberipti. Endi is materialdaryn da kóre almaityn boldyq. Ne isterimdi de bilmei otyrmyn, esti sala qolhat jazyp aýrýhanadan búgin shyqtym, - dedi 6 qańtarda Aidos Meldehan Azattyqqa.
Buǵan deiin Aidos Meldehannyń aýrýhanaǵa túsip, búiregine operatsiia jasalǵanyn Azattyq jazǵan.
Isti tergeýshi organ ońtústik óńirlik áskeri-tergeý basqarmasynyń Aidos Meldehanǵa jibergen hatynda «Adam óltirý» baby (QK 99 bap) boiynsha qozǵalǵan is 2022 jyldyń 28 jeltoqsanda «Qarý qoldanyp, bilikti asyra paidalaný» babyna (QK 451 bap) aýystyrylǵany jazylǵan. Eki kúnnen keiin iaǵni, 30 jeltoqsanda is toqtatylyp, «qupiia» qujat dep tanylǵan. Endi qupiia qujattarmen tanysý úshin Almatynyń ulttyq qaýipsizdik qyzmeti departamentinen arnaiy ruqsat alý kerek.
- Tergeý organy iste «qylmys quramy joq» deidi. Iaǵni, Aikórkemdi atý qylmys emes, qarýdy zańdy negizde qoldanǵan-mys. Árine biz shaǵymdanatyn bolamyz, - dedi advokat Rafik Beisebekov.
Isti toqtatý týraly qaýly áskeri prokýratýraǵa zańdylyǵyn tekserýge berilgen.
Tórt jasar Aikórkem Meldehan byltyr 7 qańtarda Almatyda dúken izdegen jaqyndaryna ilesip júrgen kezde oqqa ushqan. Onyń 16 jastaǵy ápkesi jaralanyp, aqpanda aýrýhanadan shyqqan. Kólikke kim oq atqany áli kúnge deiin belgisiz. Balalardyń ákesi buǵan deiin kólikten áskeri oq tapqanyn habarlaǵan.
Aidos Meldehan osyǵan deiin Azattyqqa 4 jasar búldirshinniń qazasy tergelmei otyrǵanyn, onyń otbasyna qoqan-loqy jasalǵanyn aitqan.
https://dalanews.kz/aimak/84544-qazaqstan-yenergetika-dagdarysynan-q
