- بۇل ماسقارا عوي، ءسوزىم جوق. قىزىمدى ولتىرگەندەردى تابۋدىڭ ورنىنا ءىستى توقتاتقان، ونىسىمەن قويماي ءىستى «قۇپيا» ەتىپتى. جەلتوقساننىڭ اياعىندا توقتاتىپتى. كەشە ونى ەستىپ ادۆوكاتىم ايقاي-شۋ شىعارعاننان كەيىن حات جىبەرىپتى. ەندى ءىس ماتەريالدارىن دا كورە المايتىن بولدىق. نە ىستەرىمدى دە بىلمەي وتىرمىن، ەستي سالا قولحات جازىپ اۋرۋحانادان بۇگىن شىقتىم، - دەدى 6 قاڭتاردا ايدوس مەلدەحان ازاتتىققا.

بۇعان دەيىن ايدوس مەلدەحاننىڭ اۋرۋحاناعا ءتۇسىپ، بۇيرەگىنە وپەراسيا جاسالعانىن ازاتتىق جازعان.

ءىستى تەرگەۋشى ورگان وڭتۇستىك وڭىرلىك اسكەري-تەرگەۋ باسقارماسىنىڭ ايدوس مەلدەحانعا جىبەرگەن حاتىندا «ادام ءولتىرۋ» بابى (قك 99 باپ) بويىنشا قوزعالعان ءىس 2022 جىلدىڭ 28 جەلتوقساندا «قارۋ قولدانىپ، بيلىكتى اسىرا پايدالانۋ» بابىنا (قك 451 باپ) اۋىستىرىلعانى جازىلعان. ەكى كۇننەن كەيىن ياعني، 30 جەلتوقساندا ءىس توقتاتىلىپ، «قۇپيا» قۇجات دەپ تانىلعان. ەندى قۇپيا قۇجاتتارمەن تانىسۋ ءۇشىن الماتىنىڭ ۇلتتىق قاۋىپسىزدىك قىزمەتى دەپارتامەنتىنەن ارنايى رۇقسات الۋ كەرەك.

- تەرگەۋ ورگانى ىستە «قىلمىس قۇرامى جوق» دەيدى. ياعني، ايكوركەمدى اتۋ قىلمىس ەمەس، قارۋدى زاڭدى نەگىزدە قولدانعان-مىس. ارينە ءبىز شاعىمداناتىن بولامىز، - دەدى ادۆوكات رافيك بەيسەبەكوۆ.

ءىستى توقتاتۋ تۋرالى قاۋلى اسكەري پروكۋراتۋراعا زاڭدىلىعىن تەكسەرۋگە بەرىلگەن.

ءتورت جاسار ايكوركەم مەلدەحان بىلتىر 7 قاڭتاردا الماتىدا دۇكەن ىزدەگەن جاقىندارىنا ىلەسىپ جۇرگەن كەزدە وققا ۇشقان. ونىڭ 16 جاستاعى اپكەسى جارالانىپ، اقپاندا اۋرۋحانادان شىققان. كولىككە كىم وق اتقانى ءالى كۇنگە دەيىن بەلگىسىز. بالالاردىڭ اكەسى بۇعان دەيىن كولىكتەن اسكەري وق تاپقانىن حابارلاعان.

ايدوس مەلدەحان وسىعان دەيىن ازاتتىققا 4 جاسار ءبۇلدىرشىننىڭ قازاسى تەرگەلمەي وتىرعانىن، ونىڭ وتباسىنا قوقان-لوقى جاسالعانىن ايتقان.