19 naýryzdan beri BAQ betteri men telegram arnalar Ishki ister ministrin basqarǵan Erlan Turǵymbaevqa qatysty qylmystyq is qozǵalǵanyn jarysa jazyp jatyr. Is qańtar oqiǵasyna qatysty ekeni aityldy. Al búgin Bas prokýratýra jelide taraǵan aqparattarǵa qatysty túsinik berdi, - dep habarlaidy Dalanews.kz.
Buǵan deiin Ishki ister ministrligin basqaryp otyrǵan Erjan Sádenov Turǵymbaevqa qatysty qylmystyq ministrliktiń quzyrynda emes ekenin aitqan bolatyn. Osylaisha Turǵymbaevqa qatysty qylmystyq is qozǵalǵany rastalǵandai boldy.
«Bul isti Ishki ister ministrligi tergep jatqan joq. Sondyqtan qandai is, qandai bap boiynsha is júrip jatqanyna pikir bildire almaimyn», - degen edi Sádenov Májilis kýlýarynda.
Biraq artynsha Bas prokýratýra Erlan Turǵymbaevty jáne politsiia organdarynyń basqa da basshylaryn qylmystyq qýdalaý týraly túrli telegram-arnalarda taratylǵan aqparatqa qatysty pikir bildirdi.
Vedomstvo málimetinshe, 2022 jyldyń basynan bastap Bas prokýratýra qańtar oqiǵalary kezeńinde quqyqtyq tártip pen qaýipsizdikti qamtamasyz etpeýge, sondai-aq azamattarǵa azaptaýdy qoldanýǵa bailanysty kúsh organdarynyń qyzmetkerlerine qatysty tergep-tekserýlerdi áli de jalǵastyryp jatyr. Olardy jasaǵany úshin sottarmen oblystyq politsiia jáne ulttyq qaýipsizdik organdarynyń birqatar basshylary men qyzmetkerleri sottalǵan.
Bas prokýratýranyń búgingi málimeti boiynsha, júrgizilip jatqan tergep-tekserýler barysynda Ishki ister eks-ministri Erlan Turǵymbaevtan da jaýap alynǵan. Osylaisha Bas prokýratýra Erlan Turǵymbaevqa qatysty qylmystyq is qozǵalǵany týraly aqparatty teriske shyǵarǵandai boldy.
Turǵymbaev jáne Qańtar oqiǵasy
Byltyr qańtarda Bas prokýror Berik Asylov 20 myń terrorist sol kúii tabylmaǵanyn aitqan bolatyn. Al onyń aldynda 2022 jylǵy 9 qańtarda Qazaqstan Respýblikasynyń burynǵy Ishki ister ministriniń mindetin atqarýshy bolǵan Erlan Turǵymbaev qańtardaǵy tártipsizdikter kezinde Almatyǵa 20 myńǵa jýyq lańkes kelgenin habarlaǵan edi.
Keiinnen Qańtar oqiǵasynan keiin jappai tártipsizdikterdi uiymdastyrdy dep aiyptalǵan polkovnik Rýslan Ysqaqov Erlan Turǵymbaev shynaiy faktilerdi burmalap, óz jaýapkershiliginen jaltaryp, jappai tártipsizdikterdi uiymdastyrýshy retinde Arman Jumageldievti kórsetkenin aitty.
«Bul oiǵa qonymsyz jáne múmkin emes nárse: ol Qazaqstanǵa 2021 jyldyń 17 jeltoqsanynda qyzynyń densaýlyq jaǵdaiyna bailanysty ǵana kelse, ol neni, qalai uiymdastyryp úlgeredi? Odan bólek, 2017-2021 jyldary Qazaqstanǵa ár kelgenin IIM-men maquldap otyratyn. Sońǵy kelgenin de Jumageldiev Turǵymbaevpen maquldap, oǵan dálel retinde 2021 jyly 17 jeltoqsanda sóileskenderin kórsetýge bolady», - dedi polkovnik Rýslan Ysqaqov.
Odan bólek, Erlan Turǵymbaev "Dikii Armannyń" Qańtarda Qazaqstanǵa erkin kirýin qamtamasyz etken degen aqparat tarady.
"Taǵy bir mańyzdy fakt: Turǵymbaev "Dikii Armannyń" Qańtarda Qazaqstanǵa emin-erkin kirýine járdemdesken jáne Memleket basshysyna sol tustaǵy ahýal týraly teris aqparat bergen. Nege ekeni, Ysqaqov Almatyda qarý-jaraq arsenaly saqtalǵan jáne tártipsizdikke qarsy shtab bolǵan IID ǵimaraty basyp alynǵany týraly sóz qozǵamaidy. Ysqaqov bul týraly aitpaýdy jón kóredi. Biraq Taimerdenov áýejaidy basyp alýǵa qatysqan keibir adamdardy bosatyp jibergenin basyp aitady.
Áýejaidy basyp alýǵa qatysty da bólek toqtalýǵa bolady. Ysqaqov áýejai basyp alynǵannan keiin kelgen jumbaq bort týraly, ol bort artynsha Bishkekke bos bolyp ushyp ketkeni týraly aitpaidy. Sonymen qatar, ol bort Almatyǵa 10 ret ushyp kelgenin, artynan múlde kórinbegeni týraly aitpaǵan. Shekara UQK baqylaýynda ekenin eskersek, Qazaqstanǵa Qańtar oqiǵasyn baqylaýǵa alǵan radikaldar ushyp kelýi de ǵajap emes", - delingen telegramda taraǵan aqparatta.
