Qańtar aiynda Ulttyq qordan 350 mln AQSh dollary satyldy. Bul týraly Qazaqstan Ulttyq banki málimdedi, dep habarlaidy Dalanews.kz.
Aldyn ala boljam boiynsha, aqpan aiynda respýblikalyq biýdjetke transfertterdi qamtamasyz etý úshin 350–450 mln dollar kóleminde valiýta satý josparlanyp otyr.
Ulttyq banktiń málimetinshe, qańtar qorytyndysynda teńge baǵamy 0,9%-ǵa nyǵaiyp, 1 dollar úshin 501,24 teńge deńgeiine jetken. Qazaqstan qor birjasyndaǵy ortasha kúndik saýda kólemi 359 mln dollardan 306 mln dollarǵa deiin tómendegen, al ailyq jalpy saýda kólemi 5,8 mlrd dollardy quraǵan.
Qańtarda Ulttyq qordan satylǵan 350 mln dollar biýdjetke transfertter bólýdi qamtamasyz etken. Bul soma jalpy saýda kóleminiń 6%-yn ǵana qamtyp, kúndik satylym 18,5 mln dollardan aspaǵan.
Úkimettiń aldyn ala ótinimderin jáne kútiletin fiskaldyq túsimderdi eskere otyryp, aqpanda Ulttyq bank Ulttyq qordan 350–450 mln dollar aralyǵynda valiýta satýdy kózdep otyr.
Zeinetaqy aktivterine qatysty da túsindirme berildi. Valiýtalyq aktivterdiń úlesi 40%-dan asatyndyqtan, qańtarda BJZQ-nyń investitsiialyq portfeli úshin dollar satyp alynbaǵan, aqpanda da mundai jospar joq.
Ulttyq bank aldaǵy qysqa merzimde teńge baǵamynyń dinamikasy naryq qatysýshylarynyń kútýlerine, toqsandyq salyq tólemderine, jahandyq naryqtardaǵy ahýalǵa jáne geosaiasi ózgeristerge táýeldi bolatynyn jetkizdi. Retteýshi ikemdi aiyrbas baǵamy rejimin saqtai otyryp, teńgerimsizdikterdiń jinalýyna jol bermei, altyn-valiýta rezervteriniń saqtalýyn qamtamasyz etýdi jalǵastyratynyn málimdedi.
