Қаңтар айында Ұлттық қордан 350 млн АҚШ доллары сатылды. Бұл туралы Қазақстан Ұлттық банкі мәлімдеді, деп хабарлайды Dalanews.kz.
Алдын ала болжам бойынша, ақпан айында республикалық бюджетке трансферттерді қамтамасыз ету үшін 350–450 млн доллар көлемінде валюта сату жоспарланып отыр.
Ұлттық банктің мәліметінше, қаңтар қорытындысында теңге бағамы 0,9%-ға нығайып, 1 доллар үшін 501,24 теңге деңгейіне жеткен. Қазақстан қор биржасындағы орташа күндік сауда көлемі 359 млн доллардан 306 млн долларға дейін төмендеген, ал айлық жалпы сауда көлемі 5,8 млрд долларды құраған.
Қаңтарда Ұлттық қордан сатылған 350 млн доллар бюджетке трансферттер бөлуді қамтамасыз еткен. Бұл сома жалпы сауда көлемінің 6%-ын ғана қамтып, күндік сатылым 18,5 млн доллардан аспаған.
Үкіметтің алдын ала өтінімдерін және күтілетін фискалдық түсімдерді ескере отырып, ақпанда Ұлттық банк Ұлттық қордан 350–450 млн доллар аралығында валюта сатуды көздеп отыр.
Зейнетақы активтеріне қатысты да түсіндірме берілді. Валюталық активтердің үлесі 40%-дан асатындықтан, қаңтарда БЖЗҚ-ның инвестициялық портфелі үшін доллар сатып алынбаған, ақпанда да мұндай жоспар жоқ.
Ұлттық банк алдағы қысқа мерзімде теңге бағамының динамикасы нарық қатысушыларының күтулеріне, тоқсандық салық төлемдеріне, жаһандық нарықтардағы ахуалға және геосаяси өзгерістерге тәуелді болатынын жеткізді. Реттеуші икемді айырбас бағамы режимін сақтай отырып, теңгерімсіздіктердің жиналуына жол бермей, алтын-валюта резервтерінің сақталуын қамтамасыз етуді жалғастыратынын мәлімдеді.
