Búgin Qyzylorda oblysynyń ákimi Nurlybek Nálibaevtyń qatysýymen Buqaralyq aqparat quraldary qyzmetkerleri kúnine arnalǵan «Qanatty qalam – 2025» saltanatty sharasy ótti. Basqosýǵa Mádeniet jáne aqparat vitse-ministri Aibek Sydyqov, óńirdiń BAQ salasy men ziialy qaýym ókilderi, quqyq qorǵaý jáne jaýapty sala basshylary qatysty,- dep habarlaidy Dalanews.kz
Aimaq basshysy jýrnalisterdi kásibi merekemen quttyqtap, óńirdegi bastamalar men jańashyldyqtardy halyqqa jetkizýdegi qalamgerler róline toqtaldy.
«Búgingi mereke - merzimdi basylymdar men telearnalarda, aqparattyq agenttikter men saittarda qyzmet jasaityn shyǵarmashylyq ókilderiniń, jýrnalist jasaǵan siýjet pen jazǵan maqalanyń tehnikalyq, kórkemdik turǵydan tolyqqandy jaryqqa shyǵýyna eńbek sińiretin operator, dizainer, rejisser, injenerlerdiń mereili kúni.
Sizder jańa betburystar kezeńinde qoǵam men biliktiń arasynda altyn kópir bolyp, jurtshylyqqa reformalardyń mańyzdylyǵyn jetkizýde jaýapty mindet atqaryp kelesizder.
Mereke qarsańynda Prezidentimiz Qasym-Jomart Kemeluly Buqaralyq aqparat quraldarynyń bir top qyzmetkerlerin Aqorda tórinde qabyldap, memlekettik nagradalar tabystady. Saltanatty qabyldaýda jerlesimiz, aqparat salasynda aianbai eńbek etip júrgen «Qyzylorda» telearnasynyń direktory Ámisha Nurbek Shyntemiruly «Eren eńbegi úshin» medalimen nagradtaldy. Bul - Syr jýrnalistikasynyń búgingi betalysyna berilgen joǵary baǵa.
Memleket basshymyz birlik pen berekeniń, óner men mádeniettiń qutty uiasy bolǵan Syr óńirin altyn besikke teńep, airyqsha baǵasyn bergen edi.
Osydan 100 jyl buryn Qyzylorda elimizdiń tuńǵysh astanasy bolǵan tusta áleýmettiń rýhani ómirinde erekshe serpilis jasaldy. Tarihi kezeńde respýblikalyq merzimdi basylymdardyń barlyǵy kóshirildi. Ulttyq sóz óneriniń maitalmandary, Alash ziialylary Sáken Seifýllin, Beiimbet Mailin, Júsipbek Aimaýytov, Sábit Muqanov jýrnalistik sheberlikterin shyńdap, halyqqa aqparat taratý isine belsene qatysty.
«Alashtyń anasy» atanǵan qasietti Syr óńiriniń ulttyq jýrnalistika tarihynda airyqsha orny bar. Qazaq tarihyndaǵy mańyzdy oqiǵalar Qyzylorda – ult baspasózi men jýrnalistikasynyń rýhani astanasy ekenin aiqyn dáleldeidi. Tarihi sátterdiń kýási bolǵan ardagerlerimiz búginde ortamyzda. «Syr boiymen» birge syrlasyndai ómir súrip kele jatqan Qazaqstannyń qurmetti jýrnalisteri – Shákirat Dármaǵanbetov, Qaiyrbek Myrzahmetov aǵalarymyz ben Rysty Bekbergenova apamyz mereili 90 jastyń ústine shyqty. Osy gazetterden shyqqan shyǵarmashylyq ókilderi elimizge tanylyp, qazaq ádebietinde ózindik izin qaldyrdy. Olar: Asqar Toqmaǵanbetov, Jaqsylyq Túmenbai, Tynymbai Nurmaǵanbetov, Áskerbek Rahymbekov, Asqar Kirebaev, Qazi Danabaev, Joltai Jumat sekildi belgili aqyn-jazýshylar.
Aimaǵymyzda Prezidentimizdiń tapsyrmasymen, Úkimettiń qoldaýymen júzege asyrylǵan jumystardy, igi bastamalardy halyq arasynda keńinen nasihattaýda qalalyq, aýdandyq basylymdarmen qatar «Halyq», «Álimsaq», «Ustaz mártebesi», «Til saqshysy», «Syr mektebi» sekildi gazet-jýrnaldar men internet resýrstardaǵy birneshe aqparattyq agenttik belsendi qyzmet atqarýda.
Syr óńiriniń jylnamasyn, Táýelsizdik shejiresin jasaýdaǵy qajyrly eńbekterińiz úshin sizderge zor rizashylyǵymdy, alǵysymdy bildiremin.
Aqparat aidynynda zaman kóshinen qalmai, jańa mediany meńgerip, eldikti saqtaý, azattyqty baiandy etý jolynda abyroily qyzmet atqara berińizder! Mereili merekede denderińizge saýlyq, shyǵarmashylyqtaryńyzǵa shabyt, otbasylaryńyzǵa baq-bereke tileimin!», - dedi N.Nálibaev.
Merekelik jiynda salaǵa izdenisi men kásibi sheberligin arnap, oqyrman men kórermen qurmetine bólengen jýrnalister marapat tórinen kórindi. Memleket basshysynyń Jarlyǵymen oblystyq «Syr boiy» gazeti "Rýhaniiat" bóliminiń meńgerýshisi, Qazaqstan Jazýshylar jáne Jýrnalister odaǵynyń múshesi Dúisenbek Berkinbaev «Qurmet» ordenimen, respýblikalyq «Kazahstanskaia pravda» gazetiniń menshikti tilshisi Álibek Baishúlenov pen "Qoǵam TV" arnasynyń shef-redaktory Baian Qultanova «Eren eńbegi úshin» medalimen marapattaldy. Sondai-aq, birqatar tilshilerge oblystyń eń joǵarǵy nagradasy - Qyzylorda oblysynyń «Qurmet» gramotasy, oblys ákiminiń Alǵys haty men nominatsiialar tabystaldy.
Búginde Syr jýrnalistikasynyń tarihy óziniń ǵasyrlyq belesine jaqyndady. Ótken jyly elimizdegi eń baiyrǵy basylymdardyń biri - oblystyq «Syr boiy» gazetiniń jaryqqa shyqqanyna 95 jyl tolsa, biyl «Kyzylordinskie vesti» gazeti 95 jyldyǵyn atap ótýde. Jalaǵash aýdandyq «Jalaǵash jarshysy» basylymyna 90 jyl, Shieli aýdandyq «Ósken óńir», Syrdariia aýdandyq «Tirshilik tynysy» gazetterine 85 jyl, Qyzylorda qalalyq «Aqmeshit aptalyǵy» gazetiniń jaryq kórgenine 30 jyl toldy.
