Qanat ISLAM: «Rioda qazaq boksshylary rekord jasaidy"
Belgili kásipqoi boksshy Qanat Islam Rioda Qazaqstan boksshylary altyn medaldar sany jaǵynan tarihi rekord jasaidy, dep málimdedi. Bul týraly "QazAqparat" saityna bergen suhbatynda aityldy.
– Boksshy retinde Rioda kimderge úmit artasyz?
– Qazir qazaq boksshylary – álemdegi eń azýly komandalardyń biri jáne biregeii. Sondyqtan, tórtkúl dúnieniń boksshylary bizdiń bylǵary qolǵap sheberlerinen tiksinip otyr. Óz basym barlyq boksshy baýyrlarymnan júlde kútip otyrmyn. Sonyń ishinde tórteýi altyn alady degen úmittemin.
– Esimderin atap ótseńiz?
– Olar: 49 kelidegi Birjan Jaqypov. Birjannyń bul úshinshi Olimpiadasy. Tájiribesi jetkilikti. Ábden pisip jetildi. Ózi de aqyldy jigit. Bul óziniń sońǵy Olimpiadasy ekenin jaqsy biledi. Sondyqtan tek altyn úshin bara jatyr. Ekinshi altynǵa laiyq boksshy – 69 kelidegi Daniiar Eleýsinov. Ol biyl osymen ekinshi márte Olimpiadaǵa qatysqaly otyr. Daniiar da naǵyz babynda. Onyń ústine bul qazaqtardyń menshikti salmaǵy. Ol osyǵan deiingi aǵalary salǵan altyn joldy úzbeýi tiis. Úshinshi altyn alady dep otyrǵan boksshym – 75 keli salmaqtaǵy Jánibek Álimhanuly. Bul baýyrymyz da naǵyz jalyndap turǵan shaǵynda ketip barady. Al tórtinshi altyndy Ádilbek Niiazymbetov qorjynymyzǵa salady.
– Bizdiń qazaq «aryq aityp, semiz shyǵaiyq» dep jatady. Biz «semiz» aityp qoiǵan joqpyz ba?
– Joq, olai deýge bolmaidy. Bul, birinshiden, meniń óz jeke pikirim. Ekinshiden, qazirgi qazaq boksshylary qanshalyqty deńgeide ekenin kórip turmyn. Qazir qazaq boksy eń pisip-jetilgen, órkendegen dáýirinde tur. Qazaq boksynyń dáýrendeitin ýaqyty keldi. Kóresizder áli! Senimdi túrde aitýǵa bolady. Rioda qazaq boksshylary medaldar sany jaǵynan tarihi rekord jasaityn bolady. Qazaq boksy 2000-shy jyldary bir órkendedi de, keiin sál tosyrqap qaldy. Sidnei Olimpiadasynda 2 altyn, 2 kúmis alǵannan keiin, qaityp bul kórsetkishke jete almai kelemiz. Biyl Rioda sol rekord buzylatyn bolady.
– Sizdiń oiyńyzsha, tek altyn medalmen qaitatyn siiaqtymyz...
– Joq, ózge boksshylarymyz da júldeden qur qalmaidy. Kúmis te, qola da bolady. Men barlyq boksshylarǵa úmit artyp otyrmyn.
– Ótkende bokstan Qazaqstan ulttyq quramasynyń bas bapkeri Myrzaǵali Aitjanov Sizdi AQSh-tan sparnik qarsylastar izdestirip jatyr dep edi. Ol másele qalai bolyp jatyr?
– Iá, qazir ár salmaqtan boksshylar taýyp, kelisip qoidyq. Endi, eki jaq kelise otyryp, olardyń qujattaryn rásimdeý jumystary ǵana qaldy. Buiyrsa, jaqyn arada keletin bolady. Osy shildeniń 7-si kúni ulttyq qurama Astanadaǵy oqý-jattyǵýyn bastaidy. Mende birge baryp, boksshylardyń jattyǵýyna óz úlesimdi qosqaly otyrmyn. Qazir de Almatyda solarmen birgemin.
– Áńgimeńizge raqmet! Aitqanyńyz kelip, boksshylarymyz Rioda zor tabystarǵa qol jetkizsin....
Áńgimelesken Kúnsultan OTARBAI
