بەلگىلى كاسىپقوي بوكسشى قانات يسلام ريودا قازاقستان بوكسشىلارى التىن مەدالدار سانى جاعىنان تاريحي رەكورد جاسايدى، دەپ مالىمدەدى. بۇل تۋرالى "قازاقپارات" سايتىنا بەرگەن سۇحباتىندا ايتىلدى.
– بوكسشى رەتىندە ريودا كىمدەرگە ءۇمىت ارتاسىز؟
– ءقازىر قازاق بوكسشىلارى – الەمدەگى ەڭ ازۋلى كوماندالاردىڭ ءبىرى جانە بىرەگەيى. سوندىقتان، تورتكۇل دۇنيەنىڭ بوكسشىلارى ءبىزدىڭ بىلعارى قولعاپ شەبەرلەرىنەن تىكسىنىپ وتىر. ءوز باسىم بارلىق بوكسشى باۋىرلارىمنان جۇلدە كۇتىپ وتىرمىن. سونىڭ ىشىندە تورتەۋى التىن الادى دەگەن ۇمىتتەمىن.
– ەسىمدەرىن اتاپ وتسەڭىز؟
– ولار: 49 كەلىدەگى ءبىرجان جاقىپوۆ. ءبىرجاننىڭ بۇل ءۇشىنشى وليمپياداسى. تاجىريبەسى جەتكىلىكتى. ابدەن ءپىسىپ جەتىلدى. ءوزى دە اقىلدى جىگىت. بۇل ءوزىنىڭ سوڭعى وليمپياداسى ەكەنىن جاقسى بىلەدى. سوندىقتان تەك التىن ءۇشىن بارا جاتىر. ەكىنشى التىنعا لايىق بوكسشى – 69 كەلىدەگى دانيار ەلەۋسىنوۆ. ول بيىل وسىمەن ەكىنشى مارتە وليمپياداعا قاتىسقالى وتىر. دانيار دا ناعىز بابىندا. ونىڭ ۇستىنە بۇل قازاقتاردىڭ مەنشىكتى سالماعى. ول وسىعان دەيىنگى اعالارى سالعان التىن جولدى ۇزبەۋى ءتيىس. ءۇشىنشى التىن الادى دەپ وتىرعان بوكسشىم – 75 كەلى سالماقتاعى جانىبەك ءالىمحان ۇلى. بۇل باۋىرىمىز دا ناعىز جالىنداپ تۇرعان شاعىندا كەتىپ بارادى. ال ءتورتىنشى التىندى ادىلبەك نيازىمبەتوۆ قورجىنىمىزعا سالادى.
– ءبىزدىڭ قازاق «ارىق ايتىپ، سەمىز شىعايىق» دەپ جاتادى. ءبىز «سەمىز» ايتىپ قويعان جوقپىز با؟
– جوق، ولاي دەۋگە بولمايدى. بۇل، بىرىنشىدەن، مەنىڭ ءوز جەكە پىكىرىم. ەكىنشىدەن، قازىرگى قازاق بوكسشىلارى قانشالىقتى دەڭگەيدە ەكەنىن كورىپ تۇرمىن. ءقازىر قازاق بوكسى ەڭ پىسىپ-جەتىلگەن، وركەندەگەن داۋىرىندە تۇر. قازاق بوكسىنىڭ داۋرەندەيتىن ۋاقىتى كەلدى. كورەسىزدەر ءالى! سەنىمدى تۇردە ايتۋعا بولادى. ريودا قازاق بوكسشىلارى مەدالدار سانى جاعىنان تاريحي رەكورد جاسايتىن بولادى. قازاق بوكسى 2000-شى جىلدارى ءبىر وركەندەدى دە، كەيىن ءسال توسىرقاپ قالدى. سيدنەي وليمپياداسىندا 2 التىن، 2 كۇمىس العاننان كەيىن، قايتىپ بۇل كورسەتكىشكە جەتە الماي كەلەمىز. بيىل ريودا سول رەكورد بۇزىلاتىن بولادى.
– ءسىزدىڭ ويىڭىزشا، تەك التىن مەدالمەن قايتاتىن سياقتىمىز...
– جوق، وزگە بوكسشىلارىمىز دا جۇلدەدەن قۇر قالمايدى. كۇمىس تە، قولا دا بولادى. مەن بارلىق بوكسشىلارعا ءۇمىت ارتىپ وتىرمىن.
– وتكەندە بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ ءسىزدى اقش-تان سپارنيك قارسىلاستار ىزدەستىرىپ جاتىر دەپ ەدى. ول ماسەلە قالاي بولىپ جاتىر؟
– ءيا، ءقازىر ءار سالماقتان بوكسشىلار تاۋىپ، كەلىسىپ قويدىق. ەندى، ەكى جاق كەلىسە وتىرىپ، ولاردىڭ قۇجاتتارىن راسىمدەۋ جۇمىستارى عانا قالدى. بۇيىرسا، جاقىن ارادا كەلەتىن بولادى. وسى شىلدەنىڭ 7ء-سى كۇنى ۇلتتىق قۇراما استاناداعى وقۋ-جاتتىعۋىن باستايدى. مەندە بىرگە بارىپ، بوكسشىلاردىڭ جاتتىعۋىنا ءوز ۇلەسىمدى قوسقالى وتىرمىن. ءقازىر دە الماتىدا سولارمەن بىرگەمىن.
– اڭگىمەڭىزگە راقمەت! ايتقانىڭىز كەلىپ، بوكسشىلارىمىز ريودا زور تابىستارعا قول جەتكىزسىن....
اڭگىمەلەسكەن كۇنسۇلتان وتارباي
