Máselen, aýdanda «Prima Qus» JShS-nyń qus etin óndirip, óńdeitin keshenin ashý josparlanyp otyr. Nysan biylǵy jyldyń mamyr aiynda salyna bastaǵan, 2022 jyldyń qazanynda alǵashqy ónim shyǵaralady dep kútilýde. Eksportqa baǵyttalǵan kásiporyn úsh kezeńmen iske asyrylady. Oǵan barlyǵy 97 mlrd. teńge investitsiia tartylyp, 1500-dei jumys orny ashylady. I kezeńinde qurama jem zaýyty, 24 taýyq kúrke, inkýbator, broiler semirtetin 2 alań salynady. Bul rette negizgi trassadan qus fabrikasyna deiin jol tóseýge memleket qoldaýy qajet. Sol siiaqty jergilikti kadrlar daiarlaýda, inkýbatsiialyq jumyrtqa óndirisin keńeitý úshin qosymsha jer ýchaskesin bólýge de kómek kerek. Qanat Bozymbaev aitylǵan osy máselelerdi zerttep qaraýdy tapsyrdy. Sonymen birge jergilikti turǵyndardan maman daiarlaý barysynda «Atameken» Óńirlik kásipkerler palatasynyń qoldaýymen «Eńbek» baǵdarlamasynyń múmkindikterin paidalana otyryp uiymdastyrýdy usyndy.
Osy kúni oblys basshysy jumys istep turǵan «OTAN «Green Food» JShS-nyń «Aiser» qus fabrikasyna da bardy. Bul nysan jylyna 30 myń tonna qus etin óndiredi. Ony iske qosý barysynda 20 mlrd. teńge investitsiia tartylǵan, 1200 jumys orny ashylǵan. Kásiporyn qus eti óndirisiniń tolyq tsiklyn qamtamasyz etip otyr. Atai aitqanda, munda inkýbatsiia, broiler balapandaryn ósirý, qurama jem shyǵarý, óńdeý, saqtaý, naryqqa shyǵarý – bári-bári qamtylǵan. Oblys ákimi aktsionerlerge qus fabrikasynyń qýatyn 50 myń tonnaǵa deiin arttyrýdy usyndy. Olardyń óz shikizatynan soia ósirip, qus azyǵyn óndirýge kerekti jer ýchaskesin bólý týraly ótinishterine qoldaý bildiretinin aitty. Oblys basshysy jer telimin bólý máselesi sheshilgenshe kompaniia basshylyǵy óz tarapynan jobany daiyndai berý kerektigin de jetkizdi.
Qanat Bozymbaev óńirdegi baq sharýashylyǵyna da nazar aýdardy. Baq ósirý – aýdannyń basymdyq berip otyrǵan baǵyttarynyń biri. «Shonjy Agro» JShS-nyń 500 ga jerinde órik pen qara óriktiń túrli sorttary, shie men shabdaly ósiriledi. Baqtan 7 myń tonna ónim jinalady dep kútilip otyr. Kásiporyn direktory Dilmurat Qaiyrbekov baq sýarýda sýdyń úzdiksiz jáne der kezinde berilýi mańyzdy ekenin aitty. Ol úshin kóktemge deiin kanaldardy aǵymdaǵy jóndeýden ótkizý kerek. Bul rette Q.Bozymbaev qajetti kómek kórsetýdi aýdan ákimine tapsyrdy.
Oblys ákimi qurylysynda qiyndyqtar týyndaǵan dene shynyqtyrý-saýyqtyrý kesheniniń qurylysyn baryp kórdi. Shonjyda turǵyzylyp jatqan bul nysan merdiger uiym ókilderiniń aitýynsha, aldaǵy jyldyń qazan aiynan keshiktirmei qoldanysqa beriledi. Qanat Aldabergenuly bolashaqta mundai jobalardy josparlaǵan kezde shyǵynyn azaityp, paidaly alań kólemin arttyryp, sport nysandarynyń tipti jobalaryn daiyndaý kerektigin eskertti.
Sapar barysynda Qanat Bozymbaev aýdan aktivimen júzdesip, óńirdiń damý jaǵdaiy týraly máselelerdi birlesip talqylady. Aýdan ákimi Shýhrat Nýrahýnov atqarylǵan jumystar men aldaǵy josparlarǵa qysqasha toqtaldy. Sol siiaqty Almaty oblysynyń Qurmetti azamaty Yzǵarbek Bektursynov jáne basqa da azamattar aýdannyń aýyl sharýashylyq áleýetin tiimdi paidalanýǵa qatysty oi-pikirlerimen bólisti.
Jiyn qorytyndysynda oblys ákimi eldi mekenderdi ortalyqtandyrylǵan aýyz sýmen qamtý, tozyǵy jetken aýyz sý júielerin jańǵyrtý, azyq-túlik óndirisine investitsiia tartý, iri qara mal basynyń, sút óndirisiniń tómendeýine jol bermeý, jastardyń bos ýaqytyn tiimdi uiymdastyrý máselelerine qatysty tapsyrmalar berdi.
– Uiǵyr aýdany aýyl sharýashylyǵyna negizdelgen óńir. Sondyqtan agrarlyq salaǵa investitsiia tartý eń mańyzdy basymdyqtardyń biri bolýy kerek. Bul rette sýarý júielerin jóndeý, sýarmaly jerlerdi ainalymǵa qosý jáne basqa da aýdan turǵyndary tarapynan búgingi aitylǵan usynystardy eskerińizder. Qańtar aiynda osy aýdannyń problemalaryn, ony sheshý baǵyttaryn oblys ákimdiginiń otyrysynda talqylaityn bolamyz. Qandai resýrstar kerek, qansha qarjyny talap etedi, qansha ýaqytta iske asyrylady – sonyń bárin birlesip anyqtaimyz, – dedi Qanat Bozymbaev.
