Abai oblysynyń ákimi Berik Ýáli qalany aralaý barysynda sol jaǵalaýdaǵy burynǵy «Pishevik» stadionynyń aýmaǵyn aralap, osynda salynatyn jańa sport nysandarynyń jobasymen tanysty,- dep habarlaidy Dalanews.kz
Abaidyń 180 jyldyq mereitoiyna orai Memleket basshysynyń qoldaýymen bastalǵan «Abaiǵa qurmet» aktsiiasy aiasynda Aqtóbe oblysy Abai oblysyna Jekpe-jek saraiyn syiǵa tartpaq. Aimaq basshysy ǵimarattyń «Zaria» shaǵyn aýdanynda salynatynyn aitty. Qalada buryn-sońdy bolmaǵan Muz saraiy da osy aýdanda boi kótermek.
Jekpe-jek saraiy úsh qabatty bolady. Keshen boks, kúres, dziýdo jáne ózge de sport túrleri boiynsha jarystar ótkizýge múmkindik bermek.
Oblys ákimi Semei qalasyndaǵy qurylystardyń bas josparǵa sáikes júrgiziletinin, shahardyń sol jaǵalaýyn damytýǵa erekshe mán beriletinin atap ótti.
«Qalanyń sol jaǵalaýyn da qarqyndy damytatyn bolamyz. Óitkeni, bul aýmaqta halyq kóp turady. Sondyqtan birneshe mańyzdy nysandar salý josparlanyp otyr. Burynǵy stadion ornalasqan jerge Jekpe-jek saraiy men Muz saraiyn salmaq oiymyz bar. Jer kólemi bul eki nysandy qatar ornalastyrýǵa jetkilikti. Turǵyndar úshin óte qolaily bolady. Mundai infraqurylym buqaralyq sporttyń damýyna da tyń serpin beredi», - dedi aimaq basshysy.
Oblys ákimi sol jaǵalaýdaǵy «Zaria» shaǵyn aýdanyndaǵy qurylys salynatyn aýmaqta da boldy.
Semei qalasy ákimdiginiń qaýlysyna sáikes memleket muqtajy úshin jer ýchaskelerin ielikten shyǵarý maqsatynda jer telimderi belgilengen.
Aimaq basshysy yqsham aýdandaǵy úilerdi súrý jumystary bas josparǵa sáikes júzege asyrylatynyn atap ótti.
«Bos turǵan úilerdi qoqys ornyna ainaldyrmai tazalap, retke keltirý kerek. Bolashaqta Moldaǵaliev kóshesindegi joldyń jolaqtaryn keńeitý qajet. Halyq arasynda «Satyp alynǵan úilerdiń orny durys maqsatta paidalanylmai jatyr» degen pikirler aitylyp jatyr eken. Bul – jańsaq pikir. Áýelde josparlanǵandai sol jaǵalaýda sport nysandary, úlken ǵimarattar boi kóteretin bolady», - dedi Berik Ýáli.
