اباي وبلىسىنىڭ اكىمى بەرىك ءۋالي قالانى ارالاۋ بارىسىندا سول جاعالاۋداعى بۇرىنعى «پيششيەۆيك» ستاديونىنىڭ اۋماعىن ارالاپ، وسىندا سالىناتىن جاڭا سپورت نىساندارىنىڭ جوباسىمەن تانىستى،- دەپ حابارلايدى Dalanews.kz
ابايدىڭ 180 جىلدىق مەرەيتويىنا وراي مەملەكەت باسشىسىنىڭ قولداۋىمەن باستالعان «ابايعا قۇرمەت» اكسياسى اياسىندا اقتوبە وبلىسى اباي وبلىسىنا جەكپە-جەك سارايىن سىيعا تارتپاق. ايماق باسشىسى عيماراتتىڭ «زاريا» شاعىن اۋدانىندا سالىناتىنىن ايتتى. قالادا بۇرىن-سوڭدى بولماعان مۇز سارايى دا وسى اۋداندا بوي كوتەرمەك.
جەكپە-جەك سارايى ءۇش قاباتتى بولادى. كەشەن بوكس، كۇرەس، دزيۋدو جانە وزگە دە سپورت تۇرلەرى بويىنشا جارىستار وتكىزۋگە مۇمكىندىك بەرمەك.
وبلىس اكىمى سەمەي قالاسىنداعى قۇرىلىستاردىڭ باس جوسپارعا سايكەس جۇرگىزىلەتىنىن، شاھاردىڭ سول جاعالاۋىن دامىتۋعا ەرەكشە ءمان بەرىلەتىنىن اتاپ ءوتتى.
«قالانىڭ سول جاعالاۋىن دا قارقىندى دامىتاتىن بولامىز. ويتكەنى، بۇل اۋماقتا حالىق كوپ تۇرادى. سوندىقتان بىرنەشە ماڭىزدى نىساندار سالۋ جوسپارلانىپ وتىر. بۇرىنعى ستاديون ورنالاسقان جەرگە جەكپە-جەك سارايى مەن مۇز سارايىن سالماق ويىمىز بار. جەر كولەمى بۇل ەكى نىساندى قاتار ورنالاستىرۋعا جەتكىلىكتى. تۇرعىندار ءۇشىن وتە قولايلى بولادى. مۇنداي ينفراقۇرىلىم بۇقارالىق سپورتتىڭ دامۋىنا دا تىڭ سەرپىن بەرەدى»، - دەدى ايماق باسشىسى.
وبلىس اكىمى سول جاعالاۋداعى «زاريا» شاعىن اۋدانىنداعى قۇرىلىس سالىناتىن اۋماقتا دا بولدى.
سەمەي قالاسى اكىمدىگىنىڭ قاۋلىسىنا سايكەس مەملەكەت مۇقتاجى ءۇشىن جەر ۋچاسكەلەرىن يەلىكتەن شىعارۋ ماقساتىندا جەر تەلىمدەرى بەلگىلەنگەن.
ايماق باسشىسى ىقشام اۋدانداعى ۇيلەردى ءسۇرۋ جۇمىستارى باس جوسپارعا سايكەس جۇزەگە اسىرىلاتىنىن اتاپ ءوتتى.
«بوس تۇرعان ۇيلەردى قوقىس ورنىنا اينالدىرماي تازالاپ، رەتكە كەلتىرۋ كەرەك. بولاشاقتا مولداعالييەۆ كوشەسىندەگى جولدىڭ جولاقتارىن كەڭەيتۋ قاجەت. حالىق اراسىندا «ساتىپ الىنعان ۇيلەردىڭ ورنى دۇرىس ماقساتتا پايدالانىلماي جاتىر» دەگەن پىكىرلەر ايتىلىپ جاتىر ەكەن. بۇل – جاڭساق پىكىر. اۋەلدە جوسپارلانعانداي سول جاعالاۋدا سپورت نىساندارى، ۇلكەن عيماراتتار بوي كوتەرەتىن بولادى»، - دەدى بەرىك ءۋالي.
