Almaty qalasynyń ákimi Baqytjan Saǵyntaev jeńimpazdardy quttyqtap, baıqaýdyń negizgi maqsaty – aýlalardy kógaldandyrýda jańa sheshimder tabý, qala turǵyndarynyń belsendiligi men shyǵarmashylyǵyn yntalandyrý ekenin eske saldy.
Aýla aýmaǵyn eń jaqsy abattandyrýǵa arnalǵan baıqaý turǵyndardy turǵyn aýdandarda jasyl aýmaqtar qurýǵa qatysýǵa yntalandyrdy. Sonymen qatar, mundaı baıqaýlar jas urpaqtyń ekologıalyq tárbıesine oń áser etedi.
Baıqaýǵa qatysqysy keletinder óte kóp boldy – qazylar alqasyna 324 aýla usynyldy, olardyń 85-i tańdap alyndy.
Kógaldandyrý ıdeıalary ádemi ári erekshe bolyp shyqty, sondyqtan jeńimpazdardy tańdaý ońaı bolǵan joq. Gran-prı jeńimpazyn anyqtaý úshin Qoǵamdyq keńes múshelerinen, landshaftyq sáýletshilerden, qoǵamdyq uıymdardyń basshylarynan qazylar alqasy quryldy. Al 1-3 oryndar úshin jeńimpazdar elektrondy daýys berý arqyly anyqtaldy.
Eske salsaq, baıqaý tamyz aıynyń sońynda jarıalandy, al ótinimderdi qabyldaý 3 qyrkúıekte bastaldy. Materıaldyq qordy, aýlany kógaldandyrýǵa qajet zattardy, ósimdikterdi satyp alý úshin bólinetin bas júlde 5 mıllıon teńgeni Túrksib aýdanyndaǵy Montajnaıa kóshesi, 15 mekenjaıyndaǵy aýlanyń turǵyndary aldy.
«Aýla aýmaǵyn kógaldandyrý – 2021» baıqaýynda jeńimpaz atanǵan turǵyn Iana Chıstılına óz áserimen bólisti.
– Biz aýlany jeńis úshin kógaldandyrǵan joqpyz, bul burynnan kele jatqan dástúr. Bizdiń turǵyndar óte tatý, olar ózderi turatyn qalasyn jaqsy kóredi. Almaty kýnindegi bul júlde biz úshin úlken syılyq. Men Almaty turǵyndaryna aýlalardy kútip-baptaýǵa, olarǵa qamqorlyq jasaýǵa, bastamashylyqty tanytýǵa shaqyramyn, – dedi Ia. Chıstılına.
Qazylar alqasynyń múshesi, landshaft sáýletshisi Gúlzada Qaldybaeva almatylyqtardyń aýlalaryn jaqsartýǵa degen joǵary umtylysyn atap ótti.
– Bizdiń turǵyndar ózderin úlgi retinde kórsetip óz qolyńyzben jasaý arqyly jaıly jaǵdaıda ómir súre alatynyńyzdy kórsetedi. Áriptesterimizben birge biz kóshetterdiń sanyn ǵana emes, sonymen qatar aramshópterden arylýdy da baǵaladyq, sýarýǵa, kógaldardyń jaǵdaıyna, kishi arhıtektýralyq pishinderdiń bolýyna nazar aýdardyq, - dedi G. Qaldybaeva.
Almatyda 4 183 aýla bar. Ótken jyldary 3 myńǵa jýyq aýla jóndeldi. Shamamen 550 aýla jańa kóppáterli turǵyn úılerdiń aýmaǵyna nemese apatty úılerge jatady, sondyqtan olardy jóndeý múmkin emes. Aǵymdaǵy jyly «Búdjetke qatysý» jobasy aıasynda 536 aýlany jańartý josparlanýda.
Aıta keterligi, búgin, 19 qyrkúıekte Qala kúni atalyp ótýde. Bıylǵy jyly epıdemıologıalyq jaǵdaıǵa baılanysty buqaralyq is-sharalar toqtatyldy, qalǵandary negizinen onlaın formatynda nemese qatysýshylardyń eń az sanymen ótkiziledi.
