Senatordyń aitýynsha, ótken ǵasyrdyń 60-jyldarynda negizi qalanǵan qoimada búginde 51,8 mln tonna radioaktivti qaldyq bar. Mundai ziiandy qaldyqtar oblys ortalyǵy Aqtaý qalasynan bar bolǵany 3 shaqyrym jerde jatyr. Sondyqtan da jergilikti halyqtyń alańdaýshylyǵyn týǵyzyp otyr.
Depýtat buǵan deiin qoima jeriniń qunarlyǵyn qalpyna keltirý úshin ǵylymi zertteýler júrgizilgenine nazar aýdardy. 2017 jyly zertteý nátijeleriniń negizinde quny 17,5 mlrd teńge bolatyn jobalyq-smetalyq qujat daiyndaldy. Osy jobany iske asyrý úshin biýdjette qajetti qarajat qarastyrylyp, merdiger kompaniia da anyqtalǵan jáne biyl tiisti jumystar bastalǵan. Alaida, maýsym aiynda qoimany rekýltivatsiialaý jumystary tolyǵymen toqtap qalǵan.
– Qolymyzda bar málimetterge súiensek, Ekologiia, geologiia jáne tabiǵi resýrstar ministrligi kezinde memlekettik saraptamadan ótip, bekitilgen jobalyq-smetalyq qujattardy qaita qaraý týraly sheshim qabyldaǵan.
Sondai-aq osy máseleni zerttep, zerdeleý úshin «Iadrolyq fizika» jáne «Radiatsiialyq qaýipsizdik jáne ekologiia» institýttaryna tapsyrys bergen.
Osyǵan bailanysty Ministrlik buǵan deiin qarastyrylǵan qarjyny bólýdi keiinge qaldyrǵan. Mundai sheshim, óz kezeginde, jobanyń oryndalý merzimin taǵy da uzaq jyldarǵa keiinge qaldyrý táýekelin týdyratyny sózsiz. Al, ol kezde jumys baǵasy budan da óse túsetini túsinikti, – dedi Súiindik Aldashev.
Osyǵan orai senator Ministrden jobany iske asyrýdy toqtatý jáne buǵan deiin memlekettik saraptamadan ótken jobalyq-smetalyq qujattardy qaita qaraý týraly sheshim qandai negizderge súienip qabyldanǵanyn surady.
