«Astana» sport klýbyndaǵy 2 milliard teńgeniń talan-tarajǵa túsýine klýbqa qarasty «Astana Motorsports» jetekshisi, belgili avtoshabandoz Artýr Ardavichýs aiyptalyp kelgen edi. Endi kúdiktilerdiń qataryna prezidenttik klýbtyń direktory Amanbek Kólshikov pen «Astana PRO Team» velokomandasynyń basshysy Lázzat Shámshieva qosyldy.
Jemqorlyqpen kúres agenttigi «Astana» prezidenttik kásipqoi sport klýbyna osymen úshinshi ai qatarynan shúiligiýde. Áýelde «Astana Motorsportsty» basqarǵan Artýr Ardavichýs 800 million teńgeni jymqyrdy dep aiyptalsa, artynsha aqshanyń kólemi 2 milliard teńge deiin jetken-di.
Endi kúdiktiler qatary da kóbeidi. «Samuryq Qazyna» Ulttyq ál-aýqat qory qarjylandyratyn «Astana» prezidenttik kásipqoi sport klýbynyń quramyna buryn alty sport ujymy kirse, qazir olardyń sany tórteýge qysqarǵan.
Tergeý málimetteri boiynsha, prezidenttik klýb direktory Amanbek Kólshikov 2016-2018 jyldar aralyǵynda sol sport klýbtaryna qansha qarajat kerek ekenin bile tura, olardy birneshe ese artyǵymen qarjylandyrǵan.
– Qarajattyń maqsatty jumsalǵany týraly Shamshieva jáne Ardavichýs usynǵan jalǵan esepterdi qabyldaǵan. Artyq bólingen aqsha qarajaty sheteldik kompaniialarmen jalǵan kelisimder jasaý jáne oqý-jattyqtyrý jiyndaryn uiymdastyrý, úi-jailardy jalǵa alý, taýarlyq-materialdyq qundylyqtar satyp alý boiynsha jalǵan hattamalar toltyrý jolymen jymqyrǵan, – deidi Sybailas jemqorlyqqa qarsy is-qimyl agenttiginiń bas sarapshysy Symbat Israpýlova.
Onyń aitýynsha, demeýshiler jyl saiyn kásibi jarysqa qatysýǵa álemdik standartqa sai 200-den astam brendtik velosipedterdi tegin alyp berip otyrady. Al bular 2018 jyly qajeti bolmasa da, Almatydaǵy bir kompaniiadan 6 velosipedti qosalqy bólshekterimen qosa «219 myń eýroǵa satyp aldyq» dep jalǵan qujat jasaǵan.
Ol azdai, aty atalǵan basshylar «Samuryq Qazynanyń» aqshasyn otbasy músheleri men sportqa esh qatysy joq basqa da, tamyr-tanystarynyń jol shyǵynyna jumsaǵan. Sóitip el ishinde nemese shetelge baryp kelgen áýe biletterine 100 million teńgeden astam aqshany aiamapty.
– Qazir Kólshikov jáne Shamshieva Nur-Sultan qalasynyń tergeý izoliatoryna ornalastyrylǵan, sot olarǵa qatysty 2 ai merzimge qamaýda ustaý bultartpaý sharasyn sanktsiialady. Ardavichýsqa, onyń ishinde Interpol jelisi boiynsha da, halyqaralyq izdeý jariialandy. Is boiynsha kúdiktilerdiń Almaty jáne Nur-Sultan qalalaryndaǵy qymbat múlikteri, avtotransporttyq quraldar, elitalyq páterler, jer ýchaskeleri qosa anyqtalyp, tyiym salyndy, – dedi Sybailas jemqorlyqqa qarsy is-qimyl agenttiginiń bas sarapshysy Symbat Israpýlova.
Agenttik ulttyq qordyń aqshasyn jymqyrý jaiynda osy úsheýinen artyq eshkimniń aty-jónin atǵan joq. Buǵan deiin áleýmettik jelide taraǵan atalmysh iske «Darhan Qaletaevtyń qatysy bar» degen qaýesetti de ázirge eshbir organ joqqa shyǵarǵan joq.
Ol 2009-2016 jyldary ulttyq qordyń atqarýshy direktorlarynyń biri bolǵan kezde sport salasy sonyń qaramaǵynda bolǵan edi. Al ótken aida Darhan Qaletaev Ýkrainaǵa elshi bolyp ketti.
Erbol TURYMBET
