Samara oblysynyń depýtatyna otyrysta aitqan sózi úshin áskerdi «bedelin túsirdi» degen aiyppen is qozǵaldy, dep habarlaidy Dalanews.kz.
Áńgime Samara oblysynyń saiasatkeri Grigorii Eremeev jaily bolyp otyr. Depýtatqa Resei armiiasynyń bedelin túsirý baby boiynsha is qozǵaldy. Tiisti materialdar Samara qalasyndaǵy Lenin aýdandyq sotyna joldanǵan.
Daý týdyrǵan oqiǵa 2024 jyldyń jeltoqsan aiynyń sońynda Samara oblystyq dýmasynyń otyrysynda bolǵan. «Ostorojno, novosti» Telegram-arnasynyń jazýynsha, otyrys barysynda «Demokraticheskaia partiia Rossii» atynan sailanǵan depýtat Grigorii Eremeev arnaiy áskeri operatsiianyń (soǵystyń) nátijelerin synǵa alyp, áriptesterine «sátsizdik úshin kináni moiyndap, azamattardan keshirim surap, otstavkaǵa ketýdi» usynǵan. Sonymen qatar ol Resei prezidenti Vladimir Pýtinge arnaiy áskeri operatsiia aimaǵyndaǵy soǵys qimyldaryn toqtatýdy usynǵan.
«Ostorojno, novosti» materialynda Eremeevtiń sóz sóilegen beinejazbalarynyń óshirilgeni, tek skrinshottar ǵana qalǵany da aitylǵan.
Keiinirek Eremeevtiń ózi jýrnalisterge jeltoqsan aiynyń sońynda Samara dýmasyndaǵy sózinen keiin oǵan armiiany diskreditatsiialaý baby boiynsha ákimshilik hattama toltyrylǵanyn habarlady. Onyń aitýynsha, arnaiy operatsiiaǵa qatysty málimdemelerinen soń «depýtattar biraýyzdan onyń sózin quqyq qorǵaý organdaryna joldaý jóninde daýys bergen».
Eremeev ózine qatysty jasalǵan hattamamen kelispeitinin atap ótti. Onyń sózinshe, bul aiyptaýǵa eshqandai negiz joq.
