Al aqparattyq keńistigimiz Reseidiń baqylaýynda desek asyra aitqandyq bolmas. Shyny kerek, Ortalyq Aziiadaǵy túrki tildes memleketter arasynda bizdiń halyq tym orysshyl. Ony myna bir qarapaiym jaittan anyq ańǵarýǵa bolady.
Jyl basynda Aleksei Navalnyidyń «Gelendjiktegi Pýtin saraiy» degen zertteý filmi jaryqqa shyqty. Bul film orystildi birqatar elde ai boiy Iýtýbtyń eń joǵarǵy reitingisinde kósh bastaǵany belgili. Búginde Kremldiń mazasyn qashyrǵan filmdi 113 millionnan astam adam kórip úlgergen.
Taiaýda áleýmettik jelini aqtaryp otyryp, atalmysh filminiń Iýtýbtaǵy reitingisin kórip qaldym. Kórdim de Reseidiń aqparatyna bizdiń bilik qana emes, qarapaiym halyqta jipsiz bailanǵanyna kózim jetkendei boldy.
Álgi reitingke kóz salsańyz, «Gelendjiktegi Pýtin saraiy» filmi birneshe apta boiy Iýtýbte Reseide, Ýkrainada, Belorýste, Latviiada jáne Qazaqstanda birinshi oryndy eshqandai filmge des bermei top bastaǵanyn baiqaýǵa bolady.
Iá, Ýkraina men Belorýstyń reitinginiń basynda turǵanyn túsinýge bolady. Olar baýyrlas halyq. Tili men dini ortaq. Al bizge ne joryq?
Satatistikada uzaq jyldan beri millionǵa jýyq adamy Reseige baryp, jumys istep nan taýyp júrgen Qyrǵyzstan men Ózbekstan múlde joq. Al ekonomikalyq turǵydan Reseige anaý aitqandai táýeldi emes, Qazaqstan orystyń aqparatyn jii kóretin elderdiń bel ortasynda júrýin qalai túsinýge bolady? Bul jaqsylyqtyń nyshany emes.
Búginde kórshiles Qyrǵyzstan men Ózbekstan ekonomikalyq turǵydan Reseige asa jaqyn el. Biraq qyrǵyz ben ózbekti idelogiialyq turǵydan orystyń shyrmaýyndaǵy el dep aita almaisyń.
Al orystar ekonomikalyq turǵydan qazaqtardy ózine básekeles sanaityny jasyryn emes. Óitkeni, biz de Resei sekildi syrtqa munai, astyq, ýran, metal eksporttaimyz. Bizder ekonomikalyq turǵydan orysqa muqtaj bolmasaq ta olarǵa ideologiialyq turǵydan nege táýeldimiz?
Aitpaqshy, «Gelendjiktegi Pýtin saraiy» filmi asa qyzyǵýshylyqpen kórgen elderdiń reitingisinde bizge týystas halyq ázirbaijandar da bar eken. Biraq olar Navalnyidyń filmin biz siiaqty «qatty» kórmepti. Olardyń reitinginde atalǵan film 26 orynnan árige aspaǵan.
Nurlan Jumahan, jýrnalist.
