Shyǵys Eýropa, sonyń ishinde Ýkraina men Reseidi zertteýmen ainalysatyn sarapshy sońǵy aptalarda Batys pen AQSh-tyń Kievke qatysty ustanymy naqty aiqyndalǵanyn aitady. Batys elderi Ýkrainaǵa qol ushyn sozýǵa birjolata bekingen.
"Soǵys bastalǵaly Amerikanyń strategiiasy san ret ózgerdi. Vashingtonnyń Kievke qatysty ustanymy soǵys uzarǵan saiyn san qubylyp, aqyry turaq tapty. Naqty úsh kezeńdi atap kórsetýge bolady.
Aq úi alǵashynda: "Orystar Ýkrainany eki-úsh kúnniń úshinde otarlaidy. Zelenskiidi oq pen ottyń ortasynan aman-saý alyp shyǵýymyz kerek, osy mindetti oidaǵydai oryndasaq ta jetkilikti", – dep paiymdady.
Kiev agressordyń betin qaitaryp, orystardy astananyń aýmaǵynan qýyp shyqty. Zelenskii elden ketýden úzildi-kesildi bas tartty. Batystaǵy skeptikterdiń aýzyna qum quiyldy.
Ýkrain halqynyń qaisarlyǵyna tánti bolǵan Aq úi Kievke taktikalyq qarý-jaraq tasymaldai bastady. Bular negizinen jedel jetkizýge bolatyn qural-jabdyqtar edi.
"Ýkrain halqynan mundaidy kútpep edik. Bular jaýynger ult eken. Kúshi basym jaý aldynda jasyǵan joq. Bizdiń boljam oryndalmady. Endeshe ne turys, bularǵa qol ushyp sozaiyq", – desti AQSh biligi.
Al sońǵy 10 kúnde AQSh-tyń Kremlge qatysty pozitsiiasy kúrt ózgerdi. Bul – úshinshi saty.
Kievtiń osy soǵysta jeńiske jeterine kózi jetken Amerika Máskeýdiń qabaǵyna qarap sóileitin pozitsiiadan birjolata, túbegeili bas tartty. Pýtinniń iadroly qarýdy qoldanýǵa dáti barmaitynyn, dármeni jetpeitinin túsindi.
"Biz Ýkrainaǵa osy soǵysta jeńiske jetýge járdemdesýimiz kerek". AQSh biliginiń aqyrǵy jáne aktýaldy pozitsiia osy!"
– deidi Epplbaým.
...
Amerikadaǵy saiasi elitanyń sanasyndaǵy dúmpý Batys elderin de sharpypty. London, Parij, Varshava sekildi Batys órkenietiniń betke ustar astanalary Kievke bolysýǵa tas-túiin daiyn otyr. Resei armiiasynyń kúlin kókke ushyrmaiynsha Máskeýden esken qaýip seiilmeidi, tek sol arqyly ǵana soǵysqumar Pýtinniń sazaiyn berip, sabasyna túsirýge bolady.
Sói degen Epplbaým (sýrette) Eýropanyń eteginen tartyp, Batysty osy soǵysqa aralaspaýǵa úgittep otyrǵan eldiń atyn atapty. Bul el - Germaniia.
Soǵystan zárezap bolǵan nemis biligi máseleni diplomatiia jolymen sheshkisi keledi-aq. Ókinishke orai, Pýtin diktatýrasy diplomatiianyń tilin múldem túsinbeidi. Buǵan sońǵy kezderi nemis qoǵamynyń da kózi jete bastaǵan.
"Kremlmen kikiljińge kelgisi joq Sholts biligi "Reseidiń sazaiyn berýge" úndep otyrǵan qoǵamnyń talap-tilegine qulaq asýy tiis. Germaniia soǵysqa qatysty sóz mánerin ózgertip, pozitsiiasyn qatańdatýy qajet-aq!
Pýtindi der kezinde tejemesek erteń kúlli órkeniettiń kúli kókke ushady. Nemis halqy osylai dep otyr. Bútin bir ultty jer betinen joiǵysy keletin Reseige toitarys bermesek, Kreml kósemi kózdegen maqsatyna jetip tynady", – deidi sarapshy.
...
Epplbaým orystyń Ýkraindaǵy soǵys tásili sovet úkimetinen beri ózgermegenin aitady. Resei repressiiany unatady. Pýtinniń shapqynshylyǵy ótken ǵasyrdy eske túsiredi. Ýkrainanyń birtalai eldi-mekenin basyp alǵan basqynshylar bas kóteredi-aý degen turǵyndardy jappai qamaýǵa alýda.
Úi-úidi tintip, Ýkrainanyń bairaǵy men eldiń ótken-ketkenine qatysty qundy muralardy órtep jiberip jatyr. Pýtin armiiasy adam urlaý deitin NKVD dáýirinen qalǵan sumpaiy tásildi qoldanýdan arlanbaidy. Agressorlar talai belsendiniń qolyna kisen salyp, belgisiz jaqqa aidap áketken.
"Qyz-kelinshekter qylmyskerlerdiń mazaǵyna ushyrady. Beikúná balalar azap shekti. Okkýppantardyń oǵyna ushqan ondaǵan, júzdegen adamnyń súiegi kómýsiz qaldy. Muny genotsid demei gór!
KSRO qurdymǵa ketkenmen, Reseidiń sanasy ózgermepti, óspepti. Adamdy azaptaýǵa, qorlaýǵa kelgende kelmeske ketken jendet júieniń jumys tásiline súienedi eken. NKVD-nyń kúndelikteri reseilik generaldardyń tartpasynda tyǵýly jatypty", – deidi AQSh sarapshysy.
Epplbaýmnyń pikirinshe ótken ǵasyrdyń bel ortasynda Eýraziia qurlyǵyn dúr silkindirip, Ekinshi dúniejúzilik soǵysty bastap bergen nemister sodan bergi ýaqytta kóp ózgergen. Ótken kúnderdiń qateligin oi eleginen ótkizip, endigide mundaidy boldyrmaýǵa sert etken. Soǵan sai saiasi saiasi qurylymyn tolyq ózgertip, kezinde Gitlerdiń shapqynshylyǵyna ushyraǵan halyqtardan keshirim suraǵan. Bul nemis halqynyń óskeniniń, ózgergeniniń belgisi.
Ókinishke orai, orys halqynyń oi-óresi imperlik dáýirde qalyp qalǵan. Olar orta ǵasyrdyń ólshemimen oilaidy. Olar úshin bógde eldiń jerin basyp alý jabaiylyq emes, kerisinshe orys halqynyń abyroi-bedelin ósiretin faktor.
"Soǵys Ýkraina úshin EýroOdaqqa jol ashyp berdi. Bul bir kúnniń enshisindegi dúnie emes, dese de Kievtiń odaqqa kirýi jedeldei túsedi. Pýtin Batystyń mysyn bastym dep oilasa, qatty qatelesedi. Biz dáýletti elmiz. Batys elderiniń barlyǵy derlik baqýatty turady. Bizdiń ekonomika Reseidi on oraidy, sol sekildi qaýipsizdik salasynda da Kremlge des bermeimiz.
Ýkraina osy soǵysta jeńiske jetse, Reseimen aradaǵy bailanysty birjolata úzýi tiis. Korrýptsiia ýkrain qoǵamy úshin keseldi qubylysqa ainalǵanyn qalaimyz. Eldiń Ekonomika ministrligine óz adamyn otyrǵyzyp qoiǵan at tóbelindei oligarhtardyń dáýiri kelmeske ketýi kerek. Memlekettik qyzmetke, para usynǵandy kórse allegriiasy qozatyn ary taza adamdardyń kelgenin qalaimyz. Olarǵa laiyqty jalaqy tólenýi qajet. Batys órkenietine aiaq basý úshin Ýkraina orystan juqqan ziiandy, keseldi ádetterden arylýy tiis", – deidi Epplbaým.
AQSh sarapshysy Reseidi jazalaý saiasaty qazirgi sanktsiiamen shektelmesine senimdi. Aldaǵy ýaqytta Máskeýge búgingiden soiqan sanktsiialar salynady. Ekonomikalyq, mádeni shekteýler Pýtinniń qos ókpesin qysyp, tynysyn taryltady.
Sońǵy segiz jyl boiyna Kremlge keńshilikpen qaraǵan Batys budan bylai pozitsiiasyn jumsartpaidy. Pýtinniń erkeligine tózip kelgen Amerikanyń shydamy shegine jetken.
"Osy kúnge deiin Reseige qatysty ortaq pozitsiiany aiqyndai almadyq. Ýkrainadaǵy soǵys Batys elderin bir judyryqqa jumyldyrdy. Osy úshin de Pýtinge alǵys aitamyz. Pýtinniń tusyndaǵy Resei Batystyń ata jaýyna ainalýǵa bekingen syndy. Biz bul synaqqa ázirmiz", – deidi Epplbaým.
Ázirlegen, Dýman BYQAI
