شىعىس ەۋروپا، سونىڭ ىشىندە ۋكراينا مەن رەسەيدى زەرتتەۋمەن اينالىساتىن ساراپشى سوڭعى اپتالاردا باتىس پەن اقش-تىڭ كييەۆكە قاتىستى ۇستانىمى ناقتى ايقىندالعانىن ايتادى. باتىس ەلدەرى ۋكرايناعا قول ۇشىن سوزۋعا ءبىرجولاتا بەكىنگەن.
"سوعىس باستالعالى امەريكانىڭ ستراتەگياسى سان رەت وزگەردى. ۆاشينگتوننىڭ كييەۆكە قاتىستى ۇستانىمى سوعىس ۇزارعان سايىن سان قۇبىلىپ، اقىرى تۇراق تاپتى. ناقتى ءۇش كەزەڭدى اتاپ كورسەتۋگە بولادى.
اق ءۇي العاشىندا: "ورىستار ۋكراينانى ەكى-ۇش كۇننىڭ ۇشىندە وتارلايدى. زەلەنسكييدى وق پەن وتتىڭ ورتاسىنان امان-ساۋ الىپ شىعۋىمىز كەرەك، وسى مىندەتتى ويداعىداي ورىنداساق تا جەتكىلىكتى"، – دەپ پايىمدادى.
كييەۆ اگرەسسوردىڭ بەتىن قايتارىپ، ورىستاردى استانانىڭ اۋماعىنان قۋىپ شىقتى. زەلەنسكيي ەلدەن كەتۋدەن ۇزىلدى-كەسىلدى باس تارتتى. باتىستاعى سكەپتيكتەردىڭ اۋزىنا قۇم قۇيىلدى.
ۋكراين حالقىنىڭ قايسارلىعىنا ءتانتى بولعان اق ءۇي كييەۆكە تاكتيكالىق قارۋ-جاراق تاسىمالداي باستادى. بۇلار نەگىزىنەن جەدەل جەتكىزۋگە بولاتىن قۇرال-جابدىقتار ەدى.
"ۋكراين حالقىنان مۇندايدى كۇتپەپ ەدىك. بۇلار جاۋىنگەر ۇلت ەكەن. كۇشى باسىم جاۋ الدىندا جاسىعان جوق. ءبىزدىڭ بولجام ورىندالمادى. ەندەشە نە تۇرىس، بۇلارعا قول ۇشىپ سوزايىق"، – دەستى اقش بيلىگى.
ال سوڭعى 10 كۇندە اقش-تىڭ كرەملگە قاتىستى پوزيسياسى كۇرت وزگەردى. بۇل – ءۇشىنشى ساتى.
كييەۆتىڭ وسى سوعىستا جەڭىسكە جەتەرىنە كوزى جەتكەن امەريكا ماسكەۋدىڭ قاباعىنا قاراپ سويلەيتىن پوزيسيادان ءبىرجولاتا، تۇبەگەيلى باس تارتتى. ءپۋتيننىڭ يادرولى قارۋدى قولدانۋعا ءداتى بارمايتىنىن، دارمەنى جەتپەيتىنىن ءتۇسىندى.
"ءبىز ۋكرايناعا وسى سوعىستا جەڭىسكە جەتۋگە جاردەمدەسۋىمىز كەرەك". اقش بيلىگىنىڭ اقىرعى جانە اكتۋالدى پوزيسيا وسى!"
– دەيدى ەپپلباۋم.
...
امەريكاداعى ساياسي ەليتانىڭ ساناسىنداعى ءدۇمپۋ باتىس ەلدەرىن دە شارپىپتى. لوندون، پاريج، ۆارشاۆا سەكىلدى باتىس وركەنيەتىنىڭ بەتكە ۇستار استانالارى كييەۆكە بولىسۋعا ءتاس-تۇيىن دايىن وتىر. رەسەي ارمياسىنىڭ كۇلىن كوككە ۇشىرمايىنشا ماسكەۋدەن ەسكەن ءقاۋىپ سەيىلمەيدى، تەك سول ارقىلى عانا سوعىسقۇمار ءپۋتيننىڭ سازايىن بەرىپ، ساباسىنا تۇسىرۋگە بولادى.
ءسوي دەگەن ەپپلباۋم (سۋرەتتە) ەۋروپانىڭ ەتەگىنەن تارتىپ، باتىستى وسى سوعىسقا ارالاسپاۋعا ۇگىتتەپ وتىرعان ەلدىڭ اتىن اتاپتى. بۇل ەل - گەرمانيا.
سوعىستان زارەزاپ بولعان نەمىس بيلىگى ماسەلەنى ديپلوماتيا جولىمەن شەشكىسى كەلەدى-اق. وكىنىشكە وراي، پۋتين ديكتاتۋراسى ديپلوماتيانىڭ ءتىلىن مۇلدەم تۇسىنبەيدى. بۇعان سوڭعى كەزدەرى نەمىس قوعامىنىڭ دا كوزى جەتە باستاعان.
"كرەملمەن كيكىلجىڭگە كەلگىسى جوق شولس بيلىگى "رەسەيدىڭ سازايىن بەرۋگە" ۇندەپ وتىرعان قوعامنىڭ تالاپ-تىلەگىنە قۇلاق اسۋى ءتيىس. گەرمانيا سوعىسقا قاتىستى ءسوز مانەرىن وزگەرتىپ، پوزيسياسىن قاتاڭداتۋى قاجەت-اق!
ءپۋتيندى دەر كەزىندە تەجەمەسەك ەرتەڭ كۇللى وركەنيەتتىڭ ك ۇلى كوككە ۇشادى. نەمىس حالقى وسىلاي دەپ وتىر. ءبۇتىن ءبىر ۇلتتى جەر بەتىنەن جويعىسى كەلەتىن رەسەيگە تويتارىس بەرمەسەك، كرەمل كوسەمى كوزدەگەن ماقساتىنا جەتىپ تىنادى"، – دەيدى ساراپشى.
...
ەپپلباۋم ورىستىڭ ۋكراينداعى سوعىس ءتاسىلى سوۆەت ۇكىمەتىنەن بەرى وزگەرمەگەنىن ايتادى. رەسەي رەپرەسسيانى ۇناتادى. ءپۋتيننىڭ شاپقىنشىلىعى وتكەن عاسىردى ەسكە تۇسىرەدى. ۋكراينانىڭ ءبىرتالاي ەلدى-مەكەنىن باسىپ العان باسقىنشىلار باس كوتەرەدى-اۋ دەگەن تۇرعىنداردى جاپپاي قاماۋعا الۋدا.
ءۇي-ۇيدى ءتىنتىپ، ۋكراينانىڭ بايراعى مەن ەلدىڭ وتكەن-كەتكەنىنە قاتىستى قۇندى مۇرالاردى ورتەپ جىبەرىپ جاتىر. پۋتين ارمياسى ادام ۇرلاۋ دەيتىن نكۆد داۋىرىنەن قالعان سۇمپايى ءتاسىلدى قولدانۋدان ارلانبايدى. اگرەسسورلار تالاي بەلسەندىنىڭ قولىنا كىسەن سالىپ، بەلگىسىز جاققا ايداپ اكەتكەن.
"قىز-كەلىنشەكتەر قىلمىسكەرلەردىڭ مازاعىنا ۇشىرادى. بەيكۇنا بالالار ازاپ شەكتى. وككۋپپانتاردىڭ وعىنا ۇشقان ونداعان، جۇزدەگەن ادامنىڭ سۇيەگى كومۋسىز قالدى. مۇنى گەنوسيد دەمەي گور!
كسرو قۇردىمعا كەتكەنمەن، رەسەيدىڭ ساناسى وزگەرمەپتى، وسپەپتى. ادامدى ازاپتاۋعا، قورلاۋعا كەلگەندە كەلمەسكە كەتكەن جەندەت جۇيەنىڭ جۇمىس تاسىلىنە سۇيەنەدى ەكەن. نكۆد-نىڭ كۇندەلىكتەرى رەسەيلىك گەنەرالداردىڭ تارتپاسىندا تىعۋلى جاتىپتى"، – دەيدى اقش ساراپشىسى.
ەپپلباۋمنىڭ پىكىرىنشە وتكەن عاسىردىڭ بەل ورتاسىندا ەۋرازيا قۇرلىعىن ءدۇر سىلكىندىرىپ، ەكىنشى دۇنيەجۇزىلىك سوعىستى باستاپ بەرگەن نەمىستەر سودان بەرگى ۋاقىتتا كوپ وزگەرگەن. وتكەن كۇندەردىڭ قاتەلىگىن وي ەلەگىنەن وتكىزىپ، ەندىگىدە مۇندايدى بولدىرماۋعا سەرت ەتكەن. سوعان ساي ساياسي ساياسي قۇرىلىمىن تولىق وزگەرتىپ، كەزىندە گيتلەردىڭ شاپقىنشىلىعىنا ۇشىراعان حالىقتاردان كەشىرىم سۇراعان. بۇل نەمىس حالقىنىڭ وسكەنىنىڭ، وزگەرگەنىنىڭ بەلگىسى.
وكىنىشكە وراي، ورىس حالقىنىڭ وي-ورەسى يمپەرلىك داۋىردە قالىپ قالعان. ولار ورتا عاسىردىڭ ولشەمىمەن ويلايدى. ولار ءۇشىن بوگدە ەلدىڭ جەرىن باسىپ الۋ جابايىلىق ەمەس، كەرىسىنشە ورىس حالقىنىڭ ابىروي-بەدەلىن وسىرەتىن فاكتور.
"سوعىس ۋكراينا ءۇشىن ەۋرووداققا جول اشىپ بەردى. بۇل ءبىر كۇننىڭ ەنشىسىندەگى دۇنيە ەمەس، دەسە دە كييەۆتىڭ وداققا كىرۋى جەدەلدەي تۇسەدى. پۋتين باتىستىڭ مىسىن باستىم دەپ ويلاسا، قاتتى قاتەلەسەدى. ءبىز داۋلەتتى ەلمىز. باتىس ەلدەرىنىڭ بارلىعى دەرلىك باقۋاتتى تۇرادى. ءبىزدىڭ ەكونوميكا رەسەيدى ون ورايدى، سول سەكىلدى قاۋىپسىزدىك سالاسىندا دا كرەملگە دەس بەرمەيمىز.
ۋكراينا وسى سوعىستا جەڭىسكە جەتسە، رەسەيمەن اراداعى بايلانىستى ءبىرجولاتا ءۇزۋى ءتيىس. كوررۋپسيا ۋكراين قوعامى ءۇشىن كەسەلدى قۇبىلىسقا اينالعانىن قالايمىز. ەلدىڭ ەكونوميكا مينيسترلىگىنە ءوز ادامىن وتىرعىزىپ قويعان ات توبەلىندەي وليگارحتاردىڭ ءداۋىرى كەلمەسكە كەتۋى كەرەك. مەملەكەتتىك قىزمەتكە، پارا ۇسىنعاندى كورسە اللەگرياسى قوزاتىن ارى تازا ادامداردىڭ كەلگەنىن قالايمىز. ولارعا لايىقتى جالاقى تولەنۋى قاجەت. باتىس وركەنيەتىنە اياق باسۋ ءۇشىن ۋكراينا ورىستان جۇققان زياندى، كەسەلدى ادەتتەردەن ارىلۋى ءتيىس"، – دەيدى ەپپلباۋم.
اقش ساراپشىسى رەسەيدى جازالاۋ ساياساتى قازىرگى سانكسيامەن شەكتەلمەسىنە سەنىمدى. الداعى ۋاقىتتا ماسكەۋگە بۇگىنگىدەن سويقان سانكسيالار سالىنادى. ەكونوميكالىق، مادەني شەكتەۋلەر ءپۋتيننىڭ قوس وكپەسىن قىسىپ، تىنىسىن تارىلتادى.
سوڭعى سەگىز جىل بويىنا كرەملگە كەڭشىلىكپەن قاراعان باتىس بۇدان بىلاي پوزيسياسىن جۇمسارتپايدى. ءپۋتيننىڭ ەركەلىگىنە ءتوزىپ كەلگەن امەريكانىڭ شىدامى شەگىنە جەتكەن.
"وسى كۇنگە دەيىن رەسەيگە قاتىستى ورتاق پوزيسيانى ايقىنداي المادىق. ۋكرايناداعى سوعىس باتىس ەلدەرىن ءبىر جۇدىرىققا جۇمىلدىردى. وسى ءۇشىن دە پۋتينگە العىس ايتامىز. ءپۋتيننىڭ تۇسىنداعى رەسەي باتىستىڭ اتا جاۋىنا اينالۋعا بەكىنگەن سىندى. ءبىز بۇل سىناققا ءازىرمىز"، – دەيدى ەپپلباۋم.
ازىرلەگەن، دۋمان بىقاي
