Resei prezidenti Vladimir Pýtin Astanada ótken Ujymdyq qaýipsizdik sharty uiymynyń (UQShU) Qaýipsizdik keńesinde orta qashyqtyqqa arnalǵan jańa «Oreshnik» zymyranynyń seriialyq óndirisiniń bastalǵanyn málimdedi, - dep habarlaidy Dalanews.kz "Vedomosti" saityna siltep.
Onyń aitýynsha, bul zymyrannyń álemde teńdesi joq jáne ol tereń qorǵaýdaǵy ári úlken tereńdikte ornalasqan nysandardy joiýǵa qabiletti. Pýtin Reseidiń bul zymyrandy qoldanýǵa májbúr bolǵanyn atap ótti.
– Biz ony urys jaǵdaiynda synaqtan ótkizýge májbúr boldyq. Briansk jáne Kýrsk oblystaryna ATACMS jáne Storm Shadow zymyrandary arqyly jasalǵan soqqylarǵa jaýap retinde osyndai qadamǵa bardyq, – dedi ol.
Prezidenttiń aitýynsha, «Oreshnik» zymyrany keń aýqymdy qoldanylǵan jaǵdaida soqqynyń kúshi iadrolyq qarýmen salystyrýǵa bolady. Degenmen, ol bul zymyran jappai qyryp-joiý qarýy bolyp sanalmaitynyn atap ótti. Pýtin bul qarýdyń yqtimal nysandary Ýkrainadaǵy sheshim qabyldaý ortalyqtary bolýy múmkin ekenin de aitty.
Sonymen qatar, Pýtin 28 qarashaǵa qaraǵan túni Resei armiiasy Ýkrainadaǵy nysandarǵa 90 zymyran jáne 100 ushqyshsyz apparat qoldanyp keshendi soqqy jasaǵanyn málimdedi. Onyń aitýynsha, 117 nysan joiylǵan.
– Biz sońǵy eki kúnde osy júielerdi Briansk pen Kýrsk oblystaryna ATACMS zymyrandary arqyly jasalǵan soqqylarǵa jaýap retinde qoldandyq. Barlyǵy 100 túrli zymyran júiesi men 466 ushqyshsyz apparat soqqy berdi, – dedi ol.
Prezident Ýkraina tarapynan Reseidiń memlekettik mańyzy bar nysandaryna, onyń ishinde Sankt-Peterbýrg pen Máskeýge birneshe ret soqqy jasaý áreketteri bolǵanyn atap ótti.
– Bul áreketter áli de jalǵasýda, – dedi Pýtin.
Pýtin sondai-aq Reseidiń Bas shtaby men Qorǵanys ministrligi «Oreshnik» zymyranyn qoldana otyryp, Ýkrainadaǵy jańa shabýyl nysandaryn anyqtap jatqanyn aitty. Óz sózinde ol alys qashyqtyqtaǵy Reseige jasalǵan soqqylardy NATO-nyń qaqtyǵysqa tikelei qatysýy dep sanaitynyn qaitalap ótti.
Pýtin 22 qarashada «Oreshnik» zymyran júiesin seriialyq óndiriske shyǵarý týraly sheshim qabyldanǵanyn málimdegen edi. Al 21 qarashada Resei Ýkraina aýmaǵyndaǵy Dnepropetrovskidegi áskeri-ónerkásip kesheni – «Iýjmash» zaýytyna soqqy jasaý úshin osy zymyrandy qoldanǵanyn rastady.
