AQSh prezidenti Donald Tramp Resei prezidenti Vladimir Pýtin men Ýkraina basshysy Vladimir Zelenskii arasynda kezdesý ótkizý múmkin dep sanaidy. Bul týraly Aq úidiń baspasóz hatshysy Zelenskiidiń AQSh-qa saparyna bir kún qalǵanda málimdedi, dep habarlaidy Dalanews.kz.
Tramptyń ózi de áleýmettik jelidegi Truth Social paraqshasynda Pýtinmen telefon arqyly uzaq sóileskenin habarlap, ekijaqty kezdesýdi josparlap otyrǵanyn aitty. Onyń sózinshe, AQSh pen Reseidiń joǵary laýazymdy ókilderi aldaǵy aptada Býdapeshtte kezdesýge daiyndyq júrgizedi. Amerikalyq delegatsiiany memlekettik hatshy Marko Rýbio basqarady.
«Pýtinmen kelissózder aiaqtalǵan soń, Býdapeshtte kelisilgen jerde kezdesemiz. Basty maqsat – Resei men Ýkraina arasyndaǵy “masqara soǵysty” toqtatý», – dep jazdy Tramp.
Bul usynysqa Resei de oń jaýap berdi. Prezidenttiń kómekshisi Iýrii Ýshakovtyń aitýynsha, Pýtin Tramptyń shaqyrýyn qabyldaǵan. Ol áńgime kezinde Reseidiń maidanda «strategiialyq bastamaǵa ie» ekenin jáne Ýkrainaǵa beriletin Tomahawk zymyrandary «jaǵdaidy ózgertpeitinimen, AQSh-pen qarym-qatynasqa ziian keltiretinin» aitqan.
Kremldiń bastamasymen ótken bul áńgime týraly Ýshakov:
«Pýtin Tramptyń usynysyn qoldady», – dedi.
Al Vengriia premer-ministri Viktor Orban Býdapeshttiń eki prezidenttiń kezdesýin uiymdastyrýǵa daiyn ekenin málimdedi.
«AQSh pen Resei basshylarynyń kezdesýin ótkizý – álemdegi beibitshilikke umtylǵandar úshin tamasha jańalyq. Biz daiynbyz!» – dep jazdy Orban H áleýmettik jelisinde.
Aita keteiik, Vengriia Halyqaralyq qylmystyq sottyń Pýtindi tutqyndaý týraly orderin oryndaý mindetin saqtap otyr.
