اقش پرەزيدەنتى دونالد ترامپ رەسەي پرەزيدەنتى ۆلاديمير پۋتين مەن ۋكراينا باسشىسى ۆلاديمير زەلەنسكيي اراسىندا كەزدەسۋ وتكىزۋ مۇمكىن دەپ سانايدى. بۇل تۋرالى اق ءۇيدىڭ باسپا ءسوز حاتشىسى زەلەنسكييدىڭ اقش-قا ساپارىنا ءبىر كۇن قالعاندا مالىمدەدى، دەپ حابارلايدى Dalanews.kz.

ترامپتىڭ ءوزى دە الەۋمەتتىك جەلىدەگى Truth Social پاراقشاسىندا پۋتينمەن تەلەفون ارقىلى ۇزاق سويلەسكەنىن حابارلاپ، ەكىجاقتى كەزدەسۋدى جوسپارلاپ وتىرعانىن ايتتى. ونىڭ سوزىنشە، اقش پەن رەسەيدىڭ جوعارى لاۋازىمدى وكىلدەرى الداعى اپتادا بۋداپەشتتە كەزدەسۋگە دايىندىق جۇرگىزەدى. امەريكالىق دەلەگاسيانى مەملەكەتتىك حاتشى ماركو رۋبيو باسقارادى.

«پۋتينمەن كەلىسسوزدەر اياقتالعان سوڭ، بۋداپەشتتە كەلىسىلگەن جەردە كەزدەسەمىز. باستى ماقسات – رەسەي مەن ۋكراينا اراسىنداعى “ماسقارا سوعىستى” توقتاتۋ»، – دەپ جازدى ترامپ.

بۇل ۇسىنىسقا رەسەي دە وڭ جاۋاپ بەردى. پرەزيدەنتتىڭ كومەكشىسى يۋريي ۋشاكوۆتىڭ ايتۋىنشا، پۋتين ترامپتىڭ شاقىرۋىن قابىلداعان. ول اڭگىمە كەزىندە رەسەيدىڭ مايداندا «ستراتەگيالىق باستاماعا يە» ەكەنىن جانە ۋكرايناعا بەرىلەتىن Tomahawk زىمىراندارى «جاعدايدى وزگەرتپەيتىنىمەن، اقش-پەن قارىم-قاتىناسقا زيان كەلتىرەتىنىن» ايتقان.

كرەملدىڭ باستاماسىمەن وتكەن بۇل اڭگىمە تۋرالى ۋشاكوۆ:

«پۋتين ترامپتىڭ ۇسىنىسىن قولدادى»، – دەدى.

ال ۆەنگريا پرەمەر-مينيسترى ۆيكتور وربان بۋداپەشتتىڭ ەكى پرەزيدەنتتىڭ كەزدەسۋىن ۇيىمداستىرۋعا دايىن ەكەنىن مالىمدەدى.

«اقش پەن رەسەي باسشىلارىنىڭ كەزدەسۋىن وتكىزۋ – الەمدەگى بەيبىتشىلىككە ۇمتىلعاندار ءۇشىن تاماشا جاڭالىق. ءبىز دايىنبىز!» – دەپ جازدى وربان ح الەۋمەتتىك جەلىسىندە.

ايتا كەتەيىك، ۆەنگريا حالىقارالىق قىلمىستىق سوتتىڭ ءپۋتيندى تۇتقىنداۋ تۋرالى وردەرىن ورىنداۋ مىندەتىن ساقتاپ وتىر.