Resei prezidenti Vladimir Pýtin Frantsiianyń beitarap sýlarda munai tasymaldaýshy tankerdi ustaýyn «qaraqshylyq» dep baǵalady, dep habarlaidy Dalanews.kz.
«Bul – qaraqshylyq. Iá, bul jaǵdaidan habarym bar, tanker beitarap sýlarda esh negizsiz ustaldy. Onda bálkim áskeri júk, drondar nemese basqa bir nárse izdegen shyǵar. Biraq ondai eshteńe joq, bolmaǵan da, bolýy da múmkin emes», – dedi Resei basshysy halyqaralyq «Valdai» pikirtalas klýbynyń otyrysynda.
Osylaisha Pýtin Frantsiia tarapynan ustalǵan munai tankerine qatysty oqiǵaǵa pikir bildirdi.
Eske salaiyq,Frantsiia biligi Reseidiń «kóleńkeli flotynyń» bir bóligi bolýy múmkin Boracay munai tankerin ustady. Bul topqa Reseiden munaidy Ýkrainaǵa qarsy soǵysqa bailanysty engizilgen sanktsiialardy ainalyp ótip tasymaldaityn kemeler jatady. Beisenbi kúni keme kapitanyna buiryqtarǵa baǵynbaǵany úshin aiyp taǵyldy.
MarineTraffic saitynyń derekterine sáikes, Boracay 20 qyrkúiekte Reseidiń Leningrad oblysyndaǵy Primorsk portynan shyǵyp, Úndistanǵa bet alǵan.
Frantsiia jaǵalaýyna jetpei turyp, 22 qyrkúiekte Boracay Kopengagenniń ońtústiginen shamamen 50 teńiz mili (90 km) jerde bolǵan. Dál sol kezde drondardyń ushýy Daniia biligin el astanasynyń áýejaiyn Grinvich ýaqytymen saǵat 18:30 shamasynda jabýǵa májbúr etti.
Lloyd's List basylymynyń habarlaýynsha, Daniia biligi drondar Boracay tankerinen ushyrylýy múmkin be degen kúdikpen tergeý júrgizýde. Alaida bul eldiń úkimeti kemeni ustaýǵa áreket jasamaǵan. Boracay-dan bólek, taǵy eki keme – Astrol-1 jáne Oslo Carrier 3 te kúdikke ilingen.
Resei óz kezeginde Eýropadaǵy drondardyń ushyrylýyna qatysy baryn birneshe ret joqqa shyǵarǵan.
