Stoýn eks-prezidenttiń qazirgi quziretin áigili Lý Kýan Iýdiń qyzmetimen salystyryp, bul týraly Nazarbaevtyń ne oilaitynyn surady.
"Li Kýan Iu (Singapýrdiń tuńǵysh premer-ministri, red.) tym qatal ámirshi edi. Bilikten ketkendei kóringenmen, is júzinde tizgindi bosatqan joq, jaǵdaidy tasadan baqylap otyrdy. El siz týraly da sói deidi. "Bilikten ketkenmen ulttyq qaýipsizdik, qorǵanys salasy jáne ekonomikany ýystan shyǵarmai otyr" degen pikir aitady...", – dedi Stoýn.
"Bul halyq úshin qanshalyqty tiimdi? Durys pa, álde burys pa? Sony nege sóz qylmaidy?! Eger bul eldiń órkendeýi men damýyna oń áser etse, endeshe esh sókettigi joq", – dep jaýap qatty Nazarbaev.
Onyń pikirinshe árbir el óziniń basqarý stili men damý jolyn óz qalaýyna qarai aiqyndaýǵa quqyly.
Eks-prezident oryntaǵyn eldiń qalaýynan tys, ataq-dańqy dúrkiretip turǵan tusta bosatyp bergenin aitady.
"2015 jylǵy sailaýda 95 paiyz daýys jinap, jeńiske jettim. Bul halyqtyń qurmetine bólengenimniń belgisi edi. Bizdiń zamanda adam oiyna kirip shyqpas tańǵalarlyq kórsetkish. Meni osy oryntaqta máńgilikke qaldyrý týraly másele kóterildi. Álbette, men bul usynysty qabyl alǵan joqpyn", – deidi Nazarbaev.
Al usynys kimnen tústi? Nazarbaevtan ómir boiy el bileýdi suraǵan kim? Eks-prezident bul saýalǵa jalpylama jaýap bergen eken.
"Men birjolata ketkim keldi. Menen ómir boiyna qalýymdy ótindi. Kelisken joqpyn. Odan da sailaý ótkizeiik, óz basym Qaýipsizdik keńesi men partiia basshylyǵynda qalyp, eldiń saiasi ómirine atsalysýǵa ázir ekendigimdi aittym. Usynysty qabyl aldy. Ata zańǵa ózgeris engizdi. Parlament, Konstitýtsiia bar, osy ýaqytqa deiin qabyldanǵan zańdar bar. Soǵan sai óz qyzmetimdi atqarý ústindemin", – deidi eks-prezident.
Nazarbaev qazirgi prezidenttiń jumysyna kedergi keltirmeitinin, bilikti túgeldei Toqaevqa tapsyrǵanyn málimdedi.
"Eldiń jańa prezidenti bar. Memleketti sol basqaryp otyr. Toqaev? Men onyń jumysyna aralaspaimyn, kedergi keltirmeimin. Kerisinshe, keńesshisi qyzmetindemin, qajet etse kórgen-bilgenimmen bólisýge ázirmin. Bilik Toqaevtyń qolynda. Onyń quzireti Ata zańda aiqyn jazylǵan", – deidi Nazarbaev.
Eks-prezident osy arqyly "elde qos bilik ornaǵan" degen áńgimege núkte qoiýǵa tyrysqan sekildi.
"Mundai ósek-aiań Qazaqstannyń shańyraǵyn shaiqaltýdy kózdeitinderdiń shyǵaryp júrgeni" deidi ol.
