ستوۋن ەكس-پرەزيدەنتتىڭ قازىرگى قۇزىرەتىن ايگىلى لۋ كۋان ءيۋدىڭ قىزمەتىمەن سالىستىرىپ، بۇل تۋرالى نازاربايەۆتىڭ نە ويلايتىنىن سۇرادى.
"لي كۋان يۋ (سينگاپۋردىڭ تۇڭعىش پرەمەر-مينيسترى، رەد.) تىم قاتال ءامىرشى ەدى. بيلىكتەن كەتكەندەي كورىنگەنمەن، ءىس جۇزىندە تىزگىندى بوساتقان جوق، جاعدايدى تاسادان باقىلاپ وتىردى. ەل ءسىز تۋرالى دا ءسوي دەيدى. "بيلىكتەن كەتكەنمەن ۇلتتىق قاۋىپسىزدىك، قورعانىس سالاسى جانە ەكونوميكانى ۋىستان شىعارماي وتىر" دەگەن پىكىر ايتادى..."، – دەدى ستوۋن.
"بۇل حالىق ءۇشىن قانشالىقتى ءتيىمدى؟ دۇرىس پا، الدە بۇرىس پا؟ سونى نەگە ءسوز قىلمايدى؟! ەگەر بۇل ەلدىڭ وركەندەۋى مەن دامۋىنا وڭ اسەر ەتسە، ەندەشە ەش سوكەتتىگى جوق"، – دەپ جاۋاپ قاتتى نازاربايەۆ.
ونىڭ پىكىرىنشە ءاربىر ەل ءوزىنىڭ باسقارۋ ءستيلى مەن دامۋ جولىن ءوز قالاۋىنا قاراي ايقىنداۋعا قۇقىلى.
ەكس-پرەزيدەنت ورىنتاعىن ەلدىڭ قالاۋىنان تىس، اتاق-داڭقى دۇركىرەتىپ تۇرعان تۇستا بوساتىپ بەرگەنىن ايتادى.
"2015 جىلعى سايلاۋدا 95 پايىز داۋىس جيناپ، جەڭىسكە جەتتىم. بۇل حالىقتىڭ قۇرمەتىنە بولەنگەنىمنىڭ بەلگىسى ەدى. ءبىزدىڭ زاماندا ادام ويىنا كىرىپ شىقپاس تاڭعالارلىق كورسەتكىش. مەنى وسى ورىنتاقتا ماڭگىلىككە قالدىرۋ تۋرالى ماسەلە كوتەرىلدى. البەتتە، مەن بۇل ۇسىنىستى قابىل العان جوقپىن"، – دەيدى نازاربايەۆ.
ال ۇسىنىس كىمنەن ءتۇستى؟ نازاربايەۆتان ءومىر بويى ەل بيلەۋدى سۇراعان كىم؟ ەكس-پرەزيدەنت بۇل ساۋالعا جالپىلاما جاۋاپ بەرگەن ەكەن.
"مەن ءبىرجولاتا كەتكىم كەلدى. مەنەن ءومىر بويىنا قالۋىمدى ءوتىندى. كەلىسكەن جوقپىن. ودان دا سايلاۋ وتكىزەيىك، ءوز باسىم قاۋىپسىزدىك كەڭەسى مەن پارتيا باسشىلىعىندا قالىپ، ەلدىڭ ساياسي ومىرىنە اتسالىسۋعا ءازىر ەكەندىگىمدى ايتتىم. ۇسىنىستى قابىل الدى. اتا زاڭعا وزگەرىس ەنگىزدى. پارلامەنت، كونستيتۋسيا بار، وسى ۋاقىتقا دەيىن قابىلدانعان زاڭدار بار. سوعان ساي ءوز قىزمەتىمدى اتقارۋ ۇستىندەمىن"، – دەيدى ەكس-پرەزيدەنت.
نازاربايەۆ قازىرگى پرەزيدەنتتىڭ جۇمىسىنا كەدەرگى كەلتىرمەيتىنىن، بيلىكتى تۇگەلدەي توقايەۆقا تاپسىرعانىن مالىمدەدى.
"ەلدىڭ جاڭا پرەزيدەنتى بار. مەملەكەتتى سول باسقارىپ وتىر. توقايەۆ؟ مەن ونىڭ جۇمىسىنا ارالاسپايمىن، كەدەرگى كەلتىرمەيمىن. كەرىسىنشە، كەڭەسشىسى قىزمەتىندەمىن، قاجەت ەتسە كورگەن-بىلگەنىممەن بولىسۋگە ءازىرمىن. بيلىك توقايەۆتىڭ قولىندا. ونىڭ قۇزىرەتى اتا زاڭدا ايقىن جازىلعان"، – دەيدى نازاربايەۆ.
ەكس-پرەزيدەنت وسى ارقىلى "ەلدە قوس بيلىك ورناعان" دەگەن اڭگىمەگە نۇكتە قويۋعا تىرىسقان سەكىلدى.
"مۇنداي وسەك-اياڭ قازاقستاننىڭ شاڭىراعىن شايقالتۋدى كوزدەيتىندەردىڭ شىعارىپ جۇرگەنى" دەيدى ول.
