Óskemen qalasynda Ulttyq quryltai sheshimderin júzege asyrý aiasynda «Shekaralyq aýmaqtardy damytý – óńir damýynyń negizi» taqyrybynda saraptamalyq keńestiń otyrysy ótti. Jiynǵa oblystyq basqarmalar, qoǵamdyq uiymdar, ǵylymi qaýymdastyq pen BAQ ókilderi qatysty. Onlain rejimde Zaisan aýdany ákimdigi qosyldy.
Jiyndy Shyǵys Qazaqstan oblystyq máslihatynyń tóraǵasy Denis Rypakov júrgizdi. Ol Abai jáne Shyǵys Qazaqstan oblystaryndaǵy shekaralyq aýdandar mártebesiniń qalpyna keltirilýi naqty nátijeler berip jatqanyn atap ótti: óńirlerde áleýmettik jáne ekonomikalyq ómir jandanyp, infraqurylym jaqsaryp keledi.
Memleket basshysy Qasym-Jomart Toqaev shekara mańyndaǵy aýmaqtardyń strategiialyq mańyzyna toqtalyp, olardyń mártebesin qalpyna keltirý Abai men ShQO-da júzege asyrylǵanyn eske saldy.
– Shekara mańyndaǵy eldi mekenderdegi jaǵdai memlekettiń qaýipsizdigine tikelei áser etedi jáne strategiialyq mańyzǵa ie. Sondyqtan bul baǵyttaǵy júieli jumysty jalǵastyrý qajet, – dedi Prezident.
Mańyzdy qadamdardyń biri – Tarbaǵatai, Úlken Naryn jáne Marqakól syndy buryn taratylǵan shekaralyq aýdandardyń mártebesin qaita qalpyna keltirý boldy. Bul aýmaqtardyń damýyna, jergilikti halyqtyń ómir súrý sapasyn arttyrýǵa jáne ulttyq qaýipsizdikti nyǵaitýǵa yqpal etti. Basym baǵyttardyń biri – qonys aýdarýshylardy qoldaý jáne aýyldyq jerlerge mamandar tartý jobalary: erikti qonys aýdarý baǵdarlamasy men «Diplommen – aýylǵa!» jobasy.
Qatysýshylar óńirlik damý teńgerimsizdigin azaitý qajettigin de atap ótti. Qazirgi tańda infraqurylymdyq jáne áleýmettik teńsizdikterdi joiýǵa, memlekettik organdar arasyndaǵy ózara is-qimyldy kúsheitýge baǵyttalǵan jańa Óńirlik damý tujyrymdamasy ázirlenýde.
Talqylaýǵa áleýmettanýshy, ǵylym kandidaty Eleonora Stoliarova, Ulttyq quryltai múshesi Olga Kýzovleva, oblystyq áielder isteri jáne otbasylyq-demografiialyq saiasat jónindegi komissiia múshesi Zarina Kamasova, sondai-aq ekonomika, bilim berý, jer qatynastary, kásipkerlik, týrizm basqarmalarynyń ókilderi, Zaisan aýdanynyń ákimi men ǵalymdar qatysty. Is-shara barysynda shekaralyq aimaqtardy odan ári damytýǵa baǵyttalǵan usynystar men pikirler aitylyp, jiyn qorytyndylandy.
