وسكەمەن قالاسىندا ۇلتتىق قۇرىلتاي شەشىمدەرىن جۇزەگە اسىرۋ اياسىندا «شەكارالىق اۋماقتاردى دامىتۋ – ءوڭىر دامۋىنىڭ نەگىزى» تاقىرىبىندا ساراپتامالىق كەڭەستىڭ وتىرىسى ءوتتى. جيىنعا وبلىستىق باسقارمالار، قوعامدىق ۇيىمدار، عىلىمي قاۋىمداستىق پەن ب ا ق وكىلدەرى قاتىستى. ونلاين رەجيمدە زايسان اۋدانى اكىمدىگى قوسىلدى.
جيىندى شىعىس قازاقستان وبلىستىق ءماسليحاتىنىڭ ءتوراعاسى دەنيس رىپاكوۆ جۇرگىزدى. ول اباي جانە شىعىس قازاقستان وبلىستارىنداعى شەكارالىق اۋداندار مارتەبەسىنىڭ قالپىنا كەلتىرىلۋى ناقتى ناتيجەلەر بەرىپ جاتقانىن اتاپ ءوتتى: وڭىرلەردە الەۋمەتتىك جانە ەكونوميكالىق ءومىر جاندانىپ، ينفراقۇرىلىم جاقسارىپ كەلەدى.
مەملەكەت باسشىسى قاسىم-جومارت توقايەۆ شەكارا ماڭىنداعى اۋماقتاردىڭ ستراتەگيالىق ماڭىزىنا توقتالىپ، ولاردىڭ مارتەبەسىن قالپىنا كەلتىرۋ اباي مەن شقو-دا جۇزەگە اسىرىلعانىن ەسكە سالدى.
– شەكارا ماڭىنداعى ەلدى مەكەندەردەگى جاعداي مەملەكەتتىڭ قاۋىپسىزدىگىنە تىكەلەي اسەر ەتەدى جانە ستراتەگيالىق ماڭىزعا يە. سوندىقتان بۇل باعىتتاعى جۇيەلى جۇمىستى جالعاستىرۋ قاجەت، – دەدى پرەزيدەنت.
ماڭىزدى قادامداردىڭ ءبىرى – تارباعاتاي، ۇلكەن نارىن جانە مارقاكول سىندى بۇرىن تاراتىلعان شەكارالىق اۋدانداردىڭ مارتەبەسىن قايتا قالپىنا كەلتىرۋ بولدى. بۇل اۋماقتاردىڭ دامۋىنا، جەرگىلىكتى حالىقتىڭ ءومىر ءسۇرۋ ساپاسىن ارتتىرۋعا جانە ۇلتتىق قاۋىپسىزدىكتى نىعايتۋعا ىقپال ەتتى. باسىم باعىتتاردىڭ ءبىرى – قونىس اۋدارۋشىلاردى قولداۋ جانە اۋىلدىق جەرلەرگە ماماندار تارتۋ جوبالارى: ەرىكتى قونىس اۋدارۋ باعدارلاماسى مەن «ديپلوممەن – اۋىلعا!» جوباسى.
كەزدەسۋدە كولىك-لوگيستيكالىق ينفراقۇرىلىمدى جاڭعىرتۋعا ەرەكشە نازار اۋدارىلدى. سولاردىڭ ءبىرى – بۇقتىرما سۋ قويماسى ارقىلى كوپىر سالۋ جوباسى ءساتتى جۇزەگە اسىرىلىپ، ءوڭىردىڭ كولىك بايلانىسىن ەداۋىر جاقسارتتى. سونىمەن قاتار زايسان جانە كاتونقاراعاي اۋداندارىندا ەكى جاڭا اۋەجايدىڭ قۇرىلىسى ءجۇرىپ جاتىر.
قاتىسۋشىلار وڭىرلىك دامۋ تەڭگەرىمسىزدىگىن ازايتۋ قاجەتتىگىن دە اتاپ ءوتتى. قازىرگى تاڭدا ينفراقۇرىلىمدىق جانە الەۋمەتتىك تەڭسىزدىكتەردى جويۋعا، مەملەكەتتىك ورگاندار اراسىنداعى ءوزارا ءىس-قيمىلدى كۇشەيتۋگە باعىتتالعان جاڭا وڭىرلىك دامۋ تۇجىرىمداماسى ازىرلەنۋدە.
تالقىلاۋعا الەۋمەتتانۋشى، عىلىم كانديداتى ەلەونورا ستولياروۆا، ۇلتتىق قۇرىلتاي مۇشەسى ولگا كۋزوۆليەۆا، وبلىستىق ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەسى زارينا كاماسوۆا، سونداي-اق ەكونوميكا، ءبىلىم بەرۋ، جەر قاتىناستارى، كاسىپكەرلىك، تۋريزم باسقارمالارىنىڭ وكىلدەرى، زايسان اۋدانىنىڭ اكىمى مەن عالىمدار قاتىستى. ءىس-شارا بارىسىندا شەكارالىق ايماقتاردى ودان ءارى دامىتۋعا باعىتتالعان ۇسىنىستار مەن پىكىرلەر ايتىلىپ، جيىن قورىتىندىلاندى.
