Oblys ákiminiń aıtýynsha, óńirdegi shaǵyn orta bıznes sýbektileriniń sany 138 myńǵa jetip, ótken jylmen salystyrǵanda 8,5%-ǵa ósken. Bul kórsetkish boıynsha Almaty qalasynan keıin 2-orynda tur. Jyl basynan beri negizgi kapıtalǵa salynǵan ınvestısıalar kólemi 133,7 mlrd. teńgeni qurap, 39,6%-ǵa artty. Buǵan Túrkistan qalasynyń qurylysy áser etip otyr.
«Qarapaıym zattar ekonomıkasy» baǵdarlamasyn júzege asyrý barysynda oblysta 70,8 mlrd. teńgege 207 joba qarastyrylǵan. Búgingi tańda 9,1 mlrd. teńgeni quraıtyn 6 joba ekinshi deńgeıli banktermen maquldanyp, qarjylandyrylýda. Bul kórsetkish boıynsha Túrkistan oblysy óńirler arasynda kósh bastap tur.
Óńir basshysy Úkimettiń keńeıtilgen otyrysynda QR Prezıdenti Qasym-Jomart Toqaev júktegen 9 baǵytqa negizdelgen tapsyrmalarǵa jeke-jeke toqtaldy. Sol tapsyrmalardy sapaly oryndaý úshin 5 orynbasary men apparat basshysyn jaýapty etip bekitip, árqaısysyna mindetter júktedi.
– Memleket basshysy Qasym-Jomart Kemeluly kásipkerlikti damytý, bızneske qolaıly jaǵdaı jasaý, el tabysyn arttyrý, kásipkerlikti qoldaý, eldi baspanamen qamtý, bilim berý, medısına, óńirlerdi órkendetý jáne ózge de máseleler jóninde naqty mindetter júktedi. Biz ınvestısıa kólemin aǵymdaǵy jyly 20 paıyzǵa arttyrýymyz qajet. Sondaı-aq «Qarapaıym zattar ekonomıkasy» baǵdarlamasy aıasynda, jıhaz, tamaq, toqyma salalary boıynsha iske asyrylatyn jobalardy kóbeıtip, jańa jumys oryndaryn qurýymyz kerek. Kásipkerlerge jan-jaqty qoldaý kórsetip, memlekettik-jekeshelik áriptestikti damytatyn bolamyz. Aýyl sharýashylyǵy jer telimderine aýdıt júrgizýdi jáne jer kadastrynyń aqparattyq júıesin sıfrlandyrýdy, búdjet qarjysyn qadaǵalaýdy, memlekettik mekeme basshylarynyń jaýapkershiligin kúsheıtýdi tapsyramyn. Jalpy, árbir tapsyrmanyń oryndalýy boıynsha qadamdyq jol kartasy ázirlenip, tapsyrmanyń oryndalý merzimi, atqarýshy organdar men olardyń jaýapty mamandary bekitiletin bolady. Bul tapsyrmalardyń oryndalýyn tikeleı baqylaýda ustaımyn, – dedi Ó.Shókeev.
Sesıada kásipker, oblystyq máslıhattyń depýtaty Qaınar Abasov pen oblystyq ardagerler keńesi tóraǵasynyń orynbasary Kenjehan Tólebaev Arystaǵy jaǵdaı turaqtanǵanyn aıtyp, óńir basshysynyń uıymdastyrýshylyq qabileti men jumysyna oń baǵa berdi.
Túrkistan oblysy boıynsha «Atameken» ulttyq kásipkerlik palatasynyń dırektory Dinmuhammed Ábsattarov kásipkerlikti qoldaý máselesin qozǵasa, «Altyn alqa» ıegeri, bilikti ustaz Maıra Israılova Prezıdentimizdiń ustazdar mártebesin kóterý jónindegi bastamalaryna rızashylyǵyn bildirdi. Stýdenttik qurylys jasaǵynyń belsendisi Ernar Qudaıbergen Túrkistandy túletýge jastar da daıyn ekenin jetkizdi.
Sesıaǵa qatysýshylar oblys basshysynyń jumysyna oń baǵalaryn berip, Túrkistandy túletý baǵytyndaǵy jumystardyń talapqa saı atqarylatynyna senim bildirdi.
