وبلىس اكىمىنىڭ ايتۋىنشا، وڭىردەگى شاعىن ورتا بيزنەس سۋبەكتىلەرىنىڭ سانى 138 مىڭعا جەتىپ، وتكەن جىلمەن سالىستىرعاندا 8،5%-عا وسكەن. بۇل كورسەتكىش بويىنشا الماتى قالاسىنان كەيىن 2-ورىندا تۇر. جىل باسىنان بەرى نەگىزگى كاپيتالعا سالىنعان ينۆەستيسيالار كولەمى 133،7 ملرد. تەڭگەنى قۇراپ، 39،6%-عا ارتتى. بۇعان تۇركىستان قالاسىنىڭ قۇرىلىسى اسەر ەتىپ وتىر.
«قاراپايىم زاتتار ەكونوميكاسى» باعدارلاماسىن جۇزەگە اسىرۋ بارىسىندا وبلىستا 70،8 ملرد. تەڭگەگە 207 جوبا قاراستىرىلعان. بۇگىنگى تاڭدا 9،1 ملرد. تەڭگەنى قۇرايتىن 6 جوبا ەكىنشى دەڭگەيلى بانكتەرمەن ماقۇلدانىپ، قارجىلاندىرىلۋدا. بۇل كورسەتكىش بويىنشا تۇركىستان وبلىسى وڭىرلەر اراسىندا كوش باستاپ تۇر.
ءوڭىر باسشىسى ۇكىمەتتىڭ كەڭەيتىلگەن وتىرىسىندا ق ر پرەزيدەنتى قاسىم-جومارت توقايەۆ جۇكتەگەن 9 باعىتقا نەگىزدەلگەن تاپسىرمالارعا جەكە-جەكە توقتالدى. سول تاپسىرمالاردى ساپالى ورىنداۋ ءۇشىن 5 ورىنباسارى مەن اپپارات باسشىسىن جاۋاپتى ەتىپ بەكىتىپ، ءارقايسىسىنا مىندەتتەر جۇكتەدى.
– مەملەكەت باسشىسى قاسىم-جومارت كەمەل ۇلى كاسىپكەرلىكتى دامىتۋ، بيزنەسكە قولايلى جاعداي جاساۋ، ەل تابىسىن ارتتىرۋ، كاسىپكەرلىكتى قولداۋ، ەلدى باسپانامەن قامتۋ، ءبىلىم بەرۋ، مەديسينا، وڭىرلەردى وركەندەتۋ جانە وزگە دە ماسەلەلەر جونىندە ناقتى مىندەتتەر جۇكتەدى. ءبىز ينۆەستيسيا كولەمىن اعىمداعى جىلى 20 پايىزعا ارتتىرۋىمىز قاجەت. سونداي-اق «قاراپايىم زاتتار ەكونوميكاسى» باعدارلاماسى اياسىندا، جيھاز، تاماق، توقىما سالالارى بويىنشا ىسكە اسىرىلاتىن جوبالاردى كوبەيتىپ، جاڭا جۇمىس ورىندارىن قۇرۋىمىز كەرەك. كاسىپكەرلەرگە جان-جاقتى قولداۋ كورسەتىپ، مەملەكەتتىك-جەكەشەلىك ارىپتەستىكتى دامىتاتىن بولامىز. اۋىل شارۋاشىلىعى جەر تەلىمدەرىنە اۋديت جۇرگىزۋدى جانە جەر كاداسترىنىڭ اقپاراتتىق جۇيەسىن سيفرلاندىرۋدى، بيۋدجەت قارجىسىن قاداعالاۋدى، مەملەكەتتىك مەكەمە باسشىلارىنىڭ جاۋاپكەرشىلىگىن كۇشەيتۋدى تاپسىرامىن. جالپى، ءاربىر تاپسىرمانىڭ ورىندالۋى بويىنشا قادامدىق جول كارتاسى ازىرلەنىپ، تاپسىرمانىڭ ورىندالۋ مەرزىمى، اتقارۋشى ورگاندار مەن ولاردىڭ جاۋاپتى ماماندارى بەكىتىلەتىن بولادى. بۇل تاپسىرمالاردىڭ ورىندالۋىن تىكەلەي باقىلاۋدا ۇستايمىن، – دەدى ءو.شوكەيەۆ.
سەسسيادا كاسىپكەر، وبلىستىق ءماسليحاتتىڭ دەپۋتاتى قاينار اباسوۆ پەن وبلىستىق ارداگەرلەر كەڭەسى ءتوراعاسىنىڭ ورىنباسارى كەنجەحان تولەبايەۆ ارىستاعى جاعداي تۇراقتانعانىن ايتىپ، ءوڭىر باسشىسىنىڭ ۇيىمداستىرۋشىلىق قابىلەتى مەن جۇمىسىنا وڭ باعا بەردى.
تۇركىستان وبلىسى بويىنشا «اتامەكەن» ۇلتتىق كاسىپكەرلىك پالاتاسىنىڭ ديرەكتورى دىنمۇحاممەد ءابساتتاروۆ كاسىپكەرلىكتى قولداۋ ماسەلەسىن قوزعاسا، «التىن القا» يەگەرى، بىلىكتى ۇستاز مايرا يسرايلوۆا پرەزيدەنتىمىزدىڭ ۇستازدار مارتەبەسىن كوتەرۋ جونىندەگى باستامالارىنا ريزاشىلىعىن ءبىلدىردى. ستۋدەنتتىك قۇرىلىس جاساعىنىڭ بەلسەندىسى ەرنار قۇدايبەرگەن تۇركىستاندى تۇلەتۋگە جاستار دا دايىن ەكەنىن جەتكىزدى.
سەسسياعا قاتىسۋشىلار وبلىس باسشىسىنىڭ جۇمىسىنا وڭ باعالارىن بەرىپ، تۇركىستاندى تۇلەتۋ باعىتىنداعى جۇمىستاردىڭ تالاپقا ساي اتقارىلاتىنىنا سەنىم ءبىلدىردى.
