Memleket basshysy Qasym-Jomart Toqaev Almaty qalasynyń ákimi Erbolat Dosaevty qabyldady. Óz kezeginde qala basshysy Prezidentke Almaty qalasynyń biylǵy 9 aidaǵy áleýmettik-ekonomikalyq damýynyń aldyn ala qorytyndysy týraly baiandady, – dep habarlaidy Dalanews.kz Almaty qalasy ákiminiń baspasóz qyzmetine silteme jasap.
Prezidentke qala ekonomikasynyń qarqyndy ósip kele jatqany, qysqa merzimdi ekonomikalyq indikator jyl basynan beri 13,5 paiyzǵa kóterilgeni jóninde málimet berildi.
Búginde óńdeý ónerkásibiniń damý qarqyny (+21%) boiynsha Almaty elimiz boiynsha kópten beri birinshi orynda keledi. Megapolis ekonomikasyna 1 trillion teńgeden astam investitsiia tartylǵan. Bul rette jeke investitsiialardyń ósimi 7,3 paiyzdy quraidy.
Belsendi jumys istep turǵan shaǵyn jáne orta biznes sýbektileriniń sany 341 myńǵa deiin jetip, 25,8 paiyzǵa artqan. Respýblikalyq biýdjettiń túsimi 38,4 paiyzǵa ósip, 3,91 trillion teńgege deiin jetti. Ákim Prezidentke jergilikti biýdjettiń túsimine qatysty jospar 28,7 paiyzǵa (243 mlrd teńge) asyra oryndalǵanyn jetkizdi.
Jyl basynan beri qalada 58,7 myń jumys orny ashyldy, onyń 77 paiyzy turaqty jumys oryndary ekenin aita ketýimiz kerek. Osylaisha 2023 jyl qaladaǵy ekonomika ósiminiń qarqyny 6,5 paiyzǵa deiin ulǵaiǵan.
Ákim Qasym-Jomart Toqaevqa biylǵy 18 tamyzda Almaty qalasyn damytý máseleleri jónindegi keńeste berilgen tapsyrmalardyń oryndalý barysyn da baiandaldy.
Seismikalyq qaýipsizdikti qamtamasyz etý úshin jer silkinisi týraly aldyn ala habarlaityn 28 seismostantsiia ornatý jumystary tolyǵymen aiaqtalǵanyn alǵa tartty. Tótenshe jaǵdai kezinde adamdar jinalatyn 545 qaýipsiz oryn anyqtalǵan. Meditsinalyq qyzmet kórsetý sapasyn arttyrý úshin Alǵashqy meditsinalyq-sanitarlyq kómektiń biryńǵai standarty ázirlengen. Qalada jyl basynan beri ólim-jitim kórsetkishi 11 paiyzǵa, ana ólimi 32,4 paiyzǵa, bala ólimi 35,5 paiyzǵa tómendedi. Bilim berý salasynda 4,9 myń oqýshyǵa arnalǵan 10 mektep jáne 4 qosymsha oqý korpýsy salynǵan. Búginde Memleket basshysynyń tapsyrmasyna orai, qalany kógaldandyrý jáne qoǵamdyq keńistikterdi damytýǵa erekshe kóńil bólinip otyr.
Jalpy jyl sońyna deiin qaladaǵy jasyl-jelek kólemi jan basyna shaqqanda 12,3 sharshy metrge deiin arttyrý josparlanǵan.
Almaty qalasynyń ákimi Prezidentke jyl basynan beri jasyl-jelekti avtomattandyrylǵan sýarý júiesimen qamtý kórsetkishi 3,4 ese óskenin málimdedi. Biylǵy 9 aida 405 gektar aýmaqta jumys júrgizildi. Jyl sońyna deiin bul kórsetkish 587 gektarǵa deiin jetkizilmekshi.
Sonymen qatar ákim Prezidentke Almatydaǵy ortalyqsyzdandyrý isiniń aralyq nátijeleri jaiynda da baiandady. Bul baǵytta qalada aýdan ákimdikteriniń biýdjetteri 3,1 esege, iaǵni 184,3 milliard teńgege deiin ulǵaiǵan. Sonymen qatar aýdandyq ákimdikter qosymsha 15 fýnktsiia berilgenin aita ketýimiz kerek. Búginde 196 myń sharshy metr jolǵa aǵymdaǵy jóndeý jumystary júrgizildi. 100 shaqyrymnan astam sýmen jabdyqtaý jáne sý tartý jelileri salyndy.
Kezdesý sońynda Qasym-Jomart Toqaev turǵyndardy sapaly sýmen, sý burý jelilerimen qamtamasyz etý, investitsiia tartý jónindegi sharalardy kúsheitýdi, sondai-aq Almaty aglomeratsiiasymen kólik bailanysyn jaqsartý jónindegi jobalardy odan ári damytýǵa erekshe nazar aýdarýdy tapsyrdy.
