Atyraýda ótip jatqan alqaly jiynda Memleket basshysy ulttyq biregeiligimizdi nyǵaitýmen qatar, el qorǵaǵan erlerdiń esimin jadymyzda jańǵyrtý da mańyzdy ekenin aitty, dep habarlaidy Dalanews.kz.
Onyń sózinshe, qazir kóptegen memlekette ótken kúnniń eleýli oqiǵalaryna qatysty kózqarastar aqparattyq jáne saiasi oiynnyń quralyna ainalyp barady.
"Ekinshi dúniejúzilik soǵys eski shejirege ainalǵan saiyn tarihi jáne áskeri taqyryptaǵy alyp-qashpa ańyz áńgimeler kóbeie tústi. Qazaqstan árqashan tarihi shyndyqtyń jáne adamzat jylnamasyndaǵy eń qandy qasap týraly shynaiy kózqarastyń saqtalǵanyn qalaidy.
Kelesi jyly álemde Uly Jeńistiń 80 jyldyǵy keńinen atap ótiledi. Ulttyq quryltaidyń múshesi, Májilis depýtaty Edil Jańbyrshin durys aitty, aitýly datany merekeleýge daiyndyqty qazirden bastaýymyz kerek", - dedi Prezident.
Qasym-Jomart Toqaev sońǵy jyldary memleketimiz tarihi ádildikti qalpyna keltirýge basa mán berip otyrǵanyn atap ótti.
«Tól shejiremizdiń aqtańdaq betterin» ashý úshin júieli jumys jasalyp jatyr. Ótkendi saralap, oǵan shynaiy baǵa berýdiń mańyzy zor. Sol úshin muraǵat materialdaryn muqiiat zertteý qajet.
Osy oraida «Qazaqstannyń qaharman maidangerleri» jobasyn erekshe atap ótkim keledi. Jobaǵa Qazaqstannyń Eńbek Eri, Májilis depýtaty, Ulttyq quryltaidyń múshesi Baqtyqoja Izmuhambetov jetekshilik etedi. Zertteýshiler bul jumyspen otyz jyl boiy tabandy túrde ainalysyp keledi. Osy kezeńde Qazaqstannan shyqqan jaýyngerlerdiń taǵdyry men erligi týraly 56 tom eńbek jaryq kórdi. Onyń 6 tomy maidan shebinde bolǵan áielderge arnalǵan», - dedi Prezident.
