پرەزيدەنت ءماجىلىس دەپۋتاتىنا جاڭا جوبانى جۇزەگە اسىرۋدى تاپسىردى

ازامات قويشىعارا 15 ناۋ. 2024 16:00 2665

اتىراۋدا ءوتىپ جاتقان القالى جيىندا مەملەكەت باسشىسى ۇلتتىق بىرەگەيلىگىمىزدى نىعايتۋمەن قاتار، ەل قورعاعان ەرلەردىڭ ەسىمىن جادىمىزدا جاڭعىرتۋ دا ماڭىزدى ەكەنىن ايتتى، دەپ حابارلايدى Dalanews.kz.

ونىڭ سوزىنشە، ءقازىر كوپتەگەن مەملەكەتتە وتكەن كۇننىڭ ەلەۋلى وقيعالارىنا قاتىستى كوزقاراستار اقپاراتتىق جانە ساياسي ويىننىڭ قۇرالىنا اينالىپ بارادى.

"ەكىنشى دۇنيەجۇزىلىك سوعىس ەسكى شەجىرەگە اينالعان سايىن تاريحي جانە اسكەري تاقىرىپتاعى الىپ-قاشپا اڭىز اڭگىمەلەر كوبەيە ءتۇستى. قازاقستان ءارقاشان تاريحي شىندىقتىڭ جانە ادامزات جىلناماسىنداعى ەڭ قاندى قاساپ تۋرالى شىنايى كوزقاراستىڭ ساقتالعانىن قالايدى.

كەلەسى جىلى الەمدە ۇلى جەڭىستىڭ 80 جىلدىعى كەڭىنەن اتاپ وتىلەدى. ۇلتتىق قۇرىلتايدىڭ مۇشەسى، ءماجىلىس دەپۋتاتى ەدىل جاڭبىرشين دۇرىس ايتتى، ايتۋلى داتانى مەرەكەلەۋگە دايىندىقتى قازىردەن باستاۋىمىز كەرەك"، - دەدى پرەزيدەنت.

قاسىم-جومارت توقايەۆ سوڭعى جىلدارى مەملەكەتىمىز تاريحي ادىلدىكتى قالپىنا كەلتىرۋگە باسا ءمان بەرىپ وتىرعانىن اتاپ ءوتتى.

«ءتول شەجىرەمىزدىڭ اقتاڭداق بەتتەرىن» اشۋ ءۇشىن جۇيەلى جۇمىس جاسالىپ جاتىر. وتكەندى سارالاپ، وعان شىنايى باعا بەرۋدىڭ ماڭىزى زور. سول ءۇشىن مۇراعات ماتەريالدارىن مۇقيات زەرتتەۋ قاجەت.

وسى ورايدا «قازاقستاننىڭ قاھارمان مايدانگەرلەرى» جوباسىن ەرەكشە اتاپ وتكىم كەلەدى. جوباعا قازاقستاننىڭ ەڭبەك ەرى، ءماجىلىس دەپۋتاتى، ۇلتتىق قۇرىلتايدىڭ مۇشەسى باقتىقوجا ىزمۇحامبەتوۆ جەتەكشىلىك ەتەدى. زەرتتەۋشىلەر بۇل جۇمىسپەن وتىز جىل بويى تاباندى تۇردە اينالىسىپ كەلەدى. وسى كەزەڭدە قازاقستاننان شىققان جاۋىنگەرلەردىڭ تاعدىرى مەن ەرلىگى تۋرالى 56 توم ەڭبەك جارىق كوردى. ونىڭ 6 تومى مايدان شەبىندە بولعان ايەلدەرگە ارنالعان»، - دەدى پرەزيدەنت.


ۇسىنىلعان
سوڭعى جاڭالىقتار