Búgingi Ǵylym jáne tehnologiialar jónindegi ulttyq keńestiń jiynynda Prezident jurttyń qarjylyq, aqparattyq, tsifrlyq jáne basqa da saladaǵy saýatyn arttyrý máselesin kóterdi, dep habarlaidy Dalanews.kz Aqordaǵa silteme jasai otyryp.
"Ǵalymdar árdaiym jasampazdyq jarshysy bolýǵa tiis. Qazir áleýmettik jeli arqyly halyqqa aqyl aitatyndar kóbeiip ketti. Olardyń arasynda jalǵan aqparat taratyp, jurtty adastyratyn adamdar az emes. Osyndai sanasyz, piǵyly aram adamdardyń teris yqpalyna túsip, keibir jastar ǵalamtorda neshe túrli ósek nemese halyqty arandatýdy kózdeitin materialdar jaza bastady. Biraq osy jerde bir másele bar. Tiisti mekemeler zamanaýi tehnologiialardy paidalana otyryp, osyndai destrýktivti jazbalardy jazatyn adamdardyń aty-jónin, turatyn jerin, bárin anyqtap alyp jatyr. Olar jas bolǵannan keiin ázirge túsindirý jumysy júrgizilýde. Biraq mundai áreketter jalǵasa berse, tiisti mekemeler Zań men tártip tujyrymdamasyn oryndaý úshin basqa shara qoldanýǵa májbúr bolady. Mundai sátte ǵalymdar únsiz qalmaýy kerek, jastar arasynda, jalpy qoǵamda jan-jaqty aǵartý jumysyn júrgizýi kerek. Úkimet pen ákimderdiń qyzmetinde olqylyq múldem joq dep eshkim aitpaidy, biraq olar týraly pikir aitqan kezde halyqty arandatpai, qoǵamdy shýlatpai, salmaqty jáne sanaly pikir aitý qajet. Elimizdiń turaqtylyǵy, bul – eń mańyzdy basymdyq. Kez kelgen másele jaily qoǵamdyq pikir bilikti mamandardyń kózqarasy negizinde qalyptasýy kerek", – dedi Prezident.
Osy rette Memleket basshysy ǵalymdardyń aǵartýshylyq missiiasyna erekshe nazar aýdardy.
"Sizder ár salany tereń bilesizder. Atqarylyp jatqan jumystyń mán-jaiyn jaqsy túsinesizder. Sony jastarǵa aityp jetkizý kerek. Olardyń boiynda áleýmettik optimizm qalyptastyrý óte mańyzdy. Zaman kúrdeli bolsa da, bizdiń baǵytymyz – durys. Elimiz qiyndyqtyń bárin eńserip, úzdiksiz damyp keledi. Bes jylda Qazaqstannyń ishki jalpy ónimi 181 milliardtan 291 milliard dollarǵa kóbeidi. Biylǵy 8 aidyń ózinde ekonomikamyz 6,5 paiyzǵa ósti. Elimizdiń halyqaralyq rezervi men Ulttyq qordyń aktivi 116 milliard dollardan asty. Sonyń ishinde halyqaralyq rezervimiz rekordtyq deńgeige jetip, 54,6 milliard dollar boldy. Munyń bárin basqa memleketter, bedeldi uiymdar kórip otyr, moiyndap jatyr. Mysaly, Standard and Poor’s agenttigi buǵan deiin elimizdiń damýyn "turaqty" dep boljap keldi. Endi "jaǵymdy" degen boljam jasaýda. "Syrt kóz – synshy". Álem qaýymdastyǵynyń Qazaqstanǵa degen senimi bizdiń durys jolmen kele jatqanymyzdy kórsetedi. Alaida halyqaralyq reitingterde joǵary oryn ielený – biz úshin maqsat emes, onyń ústine bul toqmeiilsýge sebep bola almaidy. Biz muny túsinýimiz kerek. Bizdiń basty mindetimiz – halyqtyń ál-aýqatyn udaiy arttyrý jáne elimizdiń básekege qabilettiligin kúsheitý. Dál sol sebepti biz qiyn da kúrdeli ózgerister arqyly reformalar júrgizemiz. Bul ońai jol emes. Elimizdi basqasha órkendete almaimyz. Bárimizdiń maqsat-múddemiz – bir. Bul – Ádiletti, Qýatty, Taza ári Qaýipsiz Qazaqstandy qurý. Bul iske ǵalymdar qaýymy mol úles qosady dep senemin", – dedi Memleket basshysy.
Buǵan deiin óz suqbatynda tanymal qajyger Ǵalym Qusaiynovtyń filialdary, nesie menedjerleri jáne kassalary bar bizge tanys bank álemi sońǵy jyldaryn bastan keship jatyr, bul eshqandai alyp-qashpa sóz emes, aiqyn faktiler, onda da úsh qýatty draiver retinde tsifrlyq teńge, jasandy intellekt (AI) jáne balamaly qarjy quraldary sipatynda búginderi qalyptasyp jatqan jańa landshaft bankterdi túbegeili ózgertýge nemese qazirgi kúiindegisin sahnadan ketýge májbúr etedi dep aitqanyn jazǵanbyz.
