Búgin Qazaqstanda Prezident Ákimshiliginiń basshysy aýysty. Memleket basshysynyń jarlyǵymen Aibek Dádebai qyzmetinen bosatylyp, onyń ornyna Roman Skliar taǵaiyndaldy. Atalǵan kadrlyq ózgeriske qatysty saiasattanýshy Talǵat Qaliev baǵasyn berdi, dep habarlaidy dalanews.kz.
Sarapshynyń aitýynsha, Prezident Ákimshiliginiń basshysy kópshilikke jii kórinetin saiasi figýra emes. Bul laýazymdaǵy tulǵa Memleket basshysynyń jumysyn qamtamasyz etip, tapsyrmalardyń oryndalýyn baqylaýmen jáne memlekettik apparattyń qyzmetin úilestirýmen ainalysady.
“Sondyqtan mundai qyzmettegi tulǵaǵa naqty baǵa berý ońai emes. Onyń jumysy kóbine ishki protsestermen bailanysty jáne jariia keńistikte keńinen kórine bermeidi”, – dedi Talǵat Qaliev.
Skliar tiimdi basqarýshy retinde tańdalǵan
Saiasattanýshynyń pikirinshe, Roman Skliar buǵan deiingi qyzmetinde ózin tájiribeli ári tiimdi menedjer retinde kórsete alǵan.
“Ol Premer-ministrdiń birinshi orynbasary retinde birneshe ret Prezident tarapynan oń baǵa aldy. Sondyqtan belgili bir kezeńde, qazirgi mindetterdi oryndaý úshin dál osy kandidat laiyq dep tanylǵan bolýy múmkin”, – deidi sarapshy.
Dádebai kezeńine baǵa
Saiasattanýshy Aibek Dádebaidyń jumysyna da toqtaldy. Aitýynsha, onyń kezeńinde el birqatar kúrdeli synaqtardan ótken.
“Máselen, byltyr sý tasqyny kezinde Qazaqstan jaǵdaidy qysqa merzimde turaqtandyra aldy. Bul memlekettik apparat jumysynyń belgili bir deńgeide tiimdi bolǵanyn kórsetedi”, – dedi ol.
Sarapshynyń sózinshe, bul kadrlyq ózgeris qoǵamda aitarlyqtai narazylyq týdyra qoimaidy. Óitkeni Prezident Ákimshiliginiń basshysy – ashyq saiasi tulǵa emes.
Sondai-aq redaktsiia jýyrda Resei prezidenti Vladimir Pýtinniń aldaǵy saparyna qatysty da pikirin surady. Alaida saiasattanýshy Talǵat Qaliev kadrlyq ózgeristiń atalǵan saparmen esh bailanysy joq ekenin atap ótti.
“Syrtqy saiasatty Qazaqstanda Syrtqy ister ministrligi júzege asyrady. Prezident Ákimshiligi negizinen ishki saiasattyń oryndalýyn baqylaýmen ainalysady”, – dedi Talǵat Qaliev.
Buǵan deiin
Aita keteiik, buǵan deiin Prezident Ákimshiliginde aýys-túiis bolǵany habarlanǵan edi. Memleket basshysynyń jarlyǵymen Aibek Dádebai basqa jumysqa aýysýyna bailanysty Qazaqstan Respýblikasy Prezidenti Ákimshiliginiń basshysy qyzmetinen bosatyldy.
Eske salaiyq, Aibek Dádebai bul qyzmetke 2024 jylǵy 6 aqpanda kelgen. Al Roman Skliar buǵan deiin Premer-ministrdiń birinshi orynbasary qyzmetin atqarǵan.
