Almaty oblysynda politsiia toqtaý týraly talapqa baǵynbai, qashýǵa tyrysqan júrgizýshini ustaý úshin kóliktiń dóńgelegine oq atty. Keiin rólde júrgizýshi kýáligi joq kámeletke tolmaǵan jasóspirim otyrǵany anyqtaldy, dep habarlaidy dalanews.kz.
Áleýmettik jelide Almaty oblysynda politsiia kólikti qýǵan sát kórinetin video tarady. Jazba avtorynyń aitýynsha, júrgizýshi tártip saqshylarynan qashýǵa tyrysqan. Ony toqtatý úshin politseiler kóliktiń dóńgelegine oq atqan.
Almaty oblystyq Politsiia departamenti málimetinshe, oqiǵa Ile aýdanynyń Jainaq aýylynda bolǵan.
"Júrgizýshi kýáligi joq kámeletke tolmaǵan jasóspirim politsiia qyzmetkerleriniń toqtaý týraly zańdy talabyn oryndamai, qozǵalysyn jalǵastyrǵan. Osylaisha jol qozǵalysynyń basqa qatysýshylaryna qaýip tóndirgen. Kólikti toqtatý úshin tártip saqshylary qyzmettik qarý qoldanǵan. Kólikti májbúrli túrde toqtatý maqsatynda politsiia qyzmetkerleri qyzmettik atys qarýynan dóńgelekke oq atty. Osydan keiin kólik toqtatyldy", - dep túsindirdi vedomstvo ókilderi.
Politsiianyń málimetinshe, jasóspirim kóliktiń jaryǵyn jaqpai júrgen. Onyń áreketi joldaǵy basqa adamdarǵa qaýip tóndirip, jol apatyna sebep bolýy múmkin edi.
Oqiǵadan keiin politsiia jasóspirimniń ákesin bala tárbiesine qatysty mindetin oryndamaǵany úshin ákimshilik jaýapkershilikke tartty. Qazir politsiia oqiǵanyń barlyq mán-jaiyn anyqtap jatyr.
