"Pompeomen kezdesýden keiin Ózbekstan prezidenti Shavkat Mirziiaev budan buryn josparlanǵan Máskeý saparynan ainyp qaldy", – dep jazady jýrnalist Ibrash Núsipbaev.
Ózbek basshysynyń Máskeýge baratyny byltyrǵy jyldyń qazanynda belgili bolǵan. Alaida AQSh-tyń memhatshysy josparlanǵan dúniege ózgeris engizgen túri bar.
"Mirziiaev búginge josparlanǵan Máskeý saparynan bas tartty. Byltyrdan beri daiyndalyp, pysyqtalǵan is-saparǵa oida-joqta barmaityn bolyp qaldy.
Mirziiaev Pýtinmen kezdesýge tiisti edi. Eki el basshysy saiasi-ekonomikalyq mazmundaǵy birqatar máseleni talqylaimyz dep sóz bailasqan-tyn.
Odaq bólek osy kezdesýde Ózbekstannyń Eýraziialyq odaqqa ótý múmkindigi is-sapar josparyna engen edi. Alaida AQSh-tyń memlekettik hatshysymen kezdeskennen keiin Mirziiaev jobalanǵan dúnieni kúrt ózgertip, ainalasy bir kún qalǵanda Máskeýge barýdan bas tartty.
Pýtin men Lavrov muny qalai baǵalar eken? Ózbek basshysynyń aiaqasty ózgerip, dostyqtan shyǵatyn syńai tanytqanyna Máskeý ne dep jaýap beredi?", – deidi jýrnalist.
Aita ketelik AQSh memlekettik hatshysy Maik Pompeo Ózbekstandy "adam quqyqtary máselesindegi progresi" úshin maqtap, eki el arasyndaǵy qarym-qatynasqa "tamasha áriptestik" degen baǵa berdi.
Memlekettik hatshy Twitter áleýmettik jelisindegi paraqshasyna "Ózbekstannyń erkin ári ashyq qoǵam men halyq aldynda esep beretin úkimet qurýǵa baǵyttalǵan reformalarǵa umtylysyn joǵary baǵalaimyn" dep jazdy.
Pompeo Ózbekstanǵa keler aldynda Nur-Sultanda aialdap, Qazaqstan prezidenti Qasym-Jomart Toqaevpen jáne oǵan deiin otyz jylǵa jýyq el basqaryp, ótken jyly naýryzda prezidenttik ókiletin merziminen buryn toqtatqan, biraq áli de bilikke yqpal etip otyrǵan Nursultan Nazarbaevpen kezdesti.
