Qazaqstandaǵy turmystyq qaldyqtar poligondarynyń jaǵdaiy syn kótermeidi. Premer-ministr Oljas Bektenov eldegi poligondardyń 20 paiyzy ǵana talaptarǵa sai ekenin aityp, osy baǵyttaǵy jumystyń baiaý júrgizilip jatqanyn qatań synǵa aldy, dep habarlaidy Dalanews.kz.
"Qazirgi tańda poligondardyń jai-kúii qandai? Mendegi aqparat boiynsha, olardyń nebári 20 paiyzy ǵana belgilengen talaptarǵa sai keledi", – dedi Úkimet basshysy.
Al Ekologiia jáne tabiǵi resýrstar ministri Erlan Nysanbaev bul baǵytta qandai jumystar júrgizilip jatqanyn jetkizdi.
"2023 jyldyń sońynda Úkimet qaldyqtardy basqarý júiesin jetildirý maqsatynda keshendi is-shara josparyn bekitti. Atalǵan jospar aiasynda 100 jańa poligon salý kózdelgen. Qazirgi ýaqytta 7 poligon paidalanýǵa berildi, 23 poligonnyń jobalyq-smetalyq qujattamasy daiyndaldy. Taǵy 18 poligonnyń qujattary rásimdelý ústinde. Qalǵan 52 poligon boiynsha biyl óńirler qarjy bólip, jobalaý jumystaryna kirisýi tiis", - dedi ol.
Ministr ekologiialyq talaptardyń qala men aýyldyq eldi mekenderge birdei qoiylýy belgili bir qiyndyqtar týyndatatynyn atap ótti.
"Aýyldyq jerlerde talaptarǵa sai poligon salý úlken qarjyny qajet etedi. Osyǵan bailanysty Ekologiialyq kodekske ózgerister engizý jáne poligondardy qarjylandyrý úshin ýtildik alym qarajatyn paidalaný máselesi qarastyrylýda", – dep qosty ministr.
Alaida Úkimet basshysy osy jumystardyń baiaý júrgizilip jatqanyn atap ótip, ministrlikke ákimdikterdiń qyzmetin tiimdi úilestirý qajettigin eskertti.
"Atqarylǵan jumystar týraly esep bar, biraq kózge kórinerlik nátije baiqalmaidy. Ministrlik bul salada belsendilik tanytýy tiis. Ókinishke qarai, ázirge ondai ustanymdy kórip otyrǵan joqpyz", – dedi Oljas Bektenov.
