قازاقستانداعى تۇرمىستىق قالدىقتار پوليگوندارىنىڭ جاعدايى سىن كوتەرمەيدى. پرەمەر-مينيستر ولجاس بەكتەنوۆ ەلدەگى پوليگونداردىڭ 20 پايىزى عانا تالاپتارعا ساي ەكەنىن ايتىپ، وسى باعىتتاعى جۇمىستىڭ باياۋ جۇرگىزىلىپ جاتقانىن قاتاڭ سىنعا الدى، دەپ حابارلايدى Dalanews.kz.

"قازىرگى تاڭدا پوليگونداردىڭ جاي-كۇيى قانداي؟ مەندەگى اقپارات بويىنشا، ولاردىڭ نەبارى 20 پايىزى عانا بەلگىلەنگەن تالاپتارعا ساي كەلەدى"، – دەدى ۇكىمەت باسشىسى.

ال ەكولوگيا جانە تابيعي رەسۋرستار ءمينيسترى ەرلان نىسانبايەۆ بۇل باعىتتا قانداي جۇمىستار جۇرگىزىلىپ جاتقانىن جەتكىزدى.

"2023 جىلدىڭ سوڭىندا ۇكىمەت قالدىقتاردى باسقارۋ جۇيەسىن جەتىلدىرۋ ماقساتىندا كەشەندى ءىس-شارا جوسپارىن بەكىتتى. اتالعان جوسپار اياسىندا 100 جاڭا پوليگون سالۋ كوزدەلگەن. قازىرگى ۋاقىتتا 7 پوليگون پايدالانۋعا بەرىلدى، 23 پوليگوننىڭ جوبالىق-سمەتالىق قۇجاتتاماسى دايىندالدى. تاعى 18 پوليگوننىڭ قۇجاتتارى راسىمدەلۋ ۇستىندە. قالعان 52 پوليگون بويىنشا بيىل وڭىرلەر قارجى ءبولىپ، جوبالاۋ جۇمىستارىنا كىرىسۋى ءتيىس"، - دەدى ول.

مينيستر ەكولوگيالىق تالاپتاردىڭ قالا مەن اۋىلدىق ەلدى مەكەندەرگە بىردەي قويىلۋى بەلگىلى ءبىر قيىندىقتار تۋىنداتاتىنىن اتاپ ءوتتى.

"اۋىلدىق جەرلەردە تالاپتارعا ساي پوليگون سالۋ ۇلكەن قارجىنى قاجەت ەتەدى. وسىعان بايلانىستى ەكولوگيالىق كودەكسكە وزگەرىستەر ەنگىزۋ جانە پوليگونداردى قارجىلاندىرۋ ءۇشىن ۋتيلدىك الىم قاراجاتىن پايدالانۋ ماسەلەسى قاراستىرىلۋدا"، – دەپ قوستى مينيستر.

الايدا ۇكىمەت باسشىسى وسى جۇمىستاردىڭ باياۋ جۇرگىزىلىپ جاتقانىن اتاپ ءوتىپ، مينيسترلىككە اكىمدىكتەردىڭ قىزمەتىن ءتيىمدى ۇيلەستىرۋ قاجەتتىگىن ەسكەرتتى.

"اتقارىلعان جۇمىستار تۋرالى ەسەپ بار، ءبىراق كوزگە كورىنەرلىك ناتيجە بايقالمايدى. مينيسترلىك بۇل سالادا بەلسەندىلىك تانىتۋى ءتيىس. وكىنىشكە قاراي، ازىرگە ونداي ۇستانىمدى كورىپ وتىرعان جوقپىز"، – دەدى ولجاس بەكتەنوۆ.