Resmi qonaqtarǵa jyly qurmetin bildirgen oblys ákimi Beibit Isabaev Jetisýda 5 strategiialyq baǵyt boiynsha óńirdiń investitsiialyq tartymdylyǵyn arttyrý jumystary júrip jatqanyn atap ótti. Bul rette aýyl sharýashylyǵy salasyna, sonyń ishinde et pen sút óńdeýge investor tartý – basym baǵyttyń biri.
– Logistikalyq jáne tranzittik turǵyda Jetisý óńiri geostrategiialyq jaǵynan da, geoekonomikalyq jaǵynan da tiimdi ornalasqan.
Sonymen qatar aimaqtyń tabiǵi-klimattyq jaǵdaiy qolaily, topyraǵy qunarly, sýy bar, munyń bári aýyl sharýashylyǵynyń belsendi damýyna oń yqpal etedi.
Janymyzda eki úlken naryq – Resei men Qytai ornalasqan. Onyń ústine, bizdiń aýmaq arqyly Batys Eýropa – Batys Qytai avtomagistrali ótedi, «Qorǵas» halyqaralyq shekaralyq yntymaqtastyq ortalyǵy, sondai-aq «Qorǵas – Shyǵys qaqpasy» erkin ekonomikalyq aimaǵy tabysty jumys istep jatyr, munda Qytaimen shekaradaǵy temirjol jáne avtomobil ótkelderin aitpaǵannyń ózinde investitsiialyq jobalardy júzege asyrýǵa qajetti barlyq infraqurylymdar bar.
Arnaiy ekonomikalyq aimaqqa et kombinatyn ornalastyrýǵa bolady, bul jer eksportqa baǵyttalǵan ónimderdi ótkizýge yńǵaily, – dedi Beibit Isabaev.
Óz kezeginde «Mostsibrodydaǵy et kombinaty» otbasylyq kásipornynyń prezidenti, Polsha Parlamentiniń depýtaty Kshishtof Borkovskii jyly qabyldaý úshin alǵys aita otyryp, kúrketaýyq pen taýyq etin óńdeitin eksportqa baǵyttalǵan zaýyt salý nietin jetkizdi. Sol siiaqty qus basyn ósirý úshin fabrika salatyn da oilary bar.
– Sapaly ári paidaly ónim shyǵarý úshin kásiporynǵa ozyq tehnologiialardy engizemiz. Sol jabdyqtarda taýyq pen kúrketaýyqtan basqa siyr etin de óńdeýge bolady. Ónimimizdi jergilikti naryqqa, sonymen qatar Qytai men Reseige satqymyz keledi.
Biz sondai-aq jasandy sý qoimalarynda tuqy balyǵyn ósirýge mamandanǵanbyz, men óz elimde osy salalarda jumys isteimin, budan bólek meniń eki et kombinatym jumys istep tur, – dedi poliak investory, sonymen qatar ol jergilikti fermerlerdi kúrketaýyq ósirý ádisterine úiretýge daiyn ekenin jetkizdi.
Bul jobalardyń qyzyǵýshylyq týdyratynyn basa aitqan aimaq basshysy mal azyǵy qoryn qurý máselesin jergilikti sharýalardyń kómegimen sheshýdi usyndy, olarmen kásipker tiisti kelisim-sharttar jasai alady.
– Mundai jobalar bizdiń oblysqa kerek. Elimizdiń zańdary aiasynda sizderge qajetti qoldaý kórsetýge, ashyq yntymaqtastyqqa daiynbyz. Ázirge kásiporyndy ornalastyrýǵa qatysty qolda bar múmkindikterimiz ben usynystarymyzdy egjei-tegjeili zerdelep, sondai-aq siz usynyp otyrǵan jobalardy júzege asyrý joldaryn birlesip jan-jaqty pysyqtaýymyz qajet, – dep túiindedi sózin Beibit Isabaev.
Kezdesý sońynda taraptar ekijaqty yntymaqtastyqty damytý týraly sheshim qabyldap, investorlardyń jaqyn aradaǵy aimaqqa sapary jóninde ýaǵdalasty.
Fotosýretter avtory: Jeńis Ysqabai
