Polshalyq kásipkerler Túrkistan oblysynyń naryǵyn igerýde qyzyǵýshylyq tanytyp otyr. Túrkistan oblysynyń ákimi Darhan Satybaldy Polshadan at terletip kelgen biznes-delegatsiiamen kezdesti. Oblys basshysy «Stasin» kompaniiasynyń prezidenti Kshishtof Borkovski bastaǵan delegatsiiaǵa Túrkistan óńiriniń múmkindikterin jetkizip, birqatar investitsiialyq jobalardy bastaýdy usyndy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Halyqaralyq naryqty jaýlaǵan iri kompaniia aýyl sharýashylyǵy salasyn damytýǵa úles qosyp, Túrkistan oblysynda aýqymdy jobalaryn iske asyrýǵa niet bildirdi. Kezdesý barysynda aimaq basshysy túrkistandyqtar jańa iskerlik bailanystar ornatýǵa, ózara tiimdi qarym-qatynas ornatýǵa árdaiym ashyq ekenin jetkizdi.
«Stasin» kompaniiasynyń ieligindegi kúrketaýyq fermalary, et kombinattary men qus fabrikalary jylyna 70 million keli et óndiredi. Álemniń 20-dan astam eline et eksporttaidy.
Kompaniianyń negizin qalaýshy Kshishtof Borkovski Túrkistan oblysynyń klimaty qolaily, investorlarǵa usynylǵan jaǵdaidyń tiimdiligin atap ótti. Sheteldik kompaniia Túrkistan oblysynda kúrketaýyq fermasyn, et kombinatyn ashýǵa daiyn. Sondai-aq karp balyǵyn ósirý boiynsha jańa jobalar usyndy. Ónim jergilikti jáne Eýropa naryǵyna shyǵady.
– Bizdiń maqsatymyz – Túrkistan oblysyn óndirisi damyǵan aimaqqa ainaldyrý, Túrkistan óńiri – biznes júrgizý úshin tiimdi orta. Óńirde aýyl sharýashylyǵy, óńdeý ónerkásibi, týrizm jáne ózge de salalarda áleýet joǵary. Investitsiialyq múmkindigimiz óte joǵary.
Bizdiń óńir – Ortalyq Aziiadaǵy bizneske eń qolaily aimaq. Oblysta arnaiy ekonomikalyq aimaq, indýstrialdy aimaqtar bar. Onda kásipkerlerdiń jobalaryn qabyldaýǵa múmkindik mol.
Infraqurylym jáne ózge de máseleler boiynsha qoldaý kórsetiledi. Qazyǵurt pen Sairam aýdanynda biznes bastaýǵa bolady. Ol úshin memleket tarapynan jan-jaqty qoldaý kórsetiledi. Biz ózderińizben investitsiia salasynda jemisti yntymaqtastyqtyń keńeiýine úmit artamyz. Alda taǵy da iri jobalardy qolǵa alýǵa atsalysamyz, – dedi Túrkistan oblysynyń ákimi Darhan Satybaldy.
Óńir basshysy oblystyń investitsiialyq áleýetin kóterý baǵytyndaǵy jumystar jalǵasatynyn, jańa kásiporyndar ashý basym baǵyt bolyp qala beretinin aityp, kezdesýlerdegi usynystar jan-jaqty qaralatynyn jetkizdi.
