Kaspi.kz búgin Tencent, Kaspi.kz basshysy ári negizin qalaýshylardyń biri Mıhaıl Lomtadze, basqarýshy komandanyń negizgi músheleri jáne uzaq merzimdi ınstıtýsıonaldyq ınvestorlar Baring Fintech Venture Funds qorynan Kaspi.kz-tiń 6 mıllıonǵa jýyq amerıkandyq depozıtarlyq aksıasyn satyp alýdy aıaqtaǵanyn málimdedi, dep habarlaıdy Dalanews.kz.
Mıhaıl Lomtadze bylaı túsindirip ótti:
«Tencent — Qytaıdyń iri tehnologıalyq kompanıasy, úzdik qosymshanyń bıznes-modeliniń pıoneri jáne álemdegi eń tanymal mobıldi qosymshalardyń biri – 1,3 mıllıardtan astam adam qoldanatyn WeChat-tyń negizin qalaýshy. Tencent-tiń Kaspi.kz-tiń iri aksıonerleriniń qataryna qosylýy – biz úshin úlken mártebe!
Meniń jeke ınvestısıam, basqarýshy komandamyzdyń negizgi músheleriniń ınvestısıalarymen birge kompanıamyzdyń bıznes-modeline jáne uzaq merzimdi strategıasyna degen nyq senimdi bildiredi.
Biz sondaı-aq qarjyteh salasyndaǵy Spice Expeditions halyqaralyq ınvestısıalyq kompanıasynyń, AQSH-tyń Washington University jáne WISIMCO / University of Wisconsin Foundation sıaqty ýnıversıtettik ınvestısıalyq qorlarynyń uzaq merzimdi aksıonerlerimizdiń qataryna qosylǵanyn maqtanyshpen habarlaımyz».
Eske salaıyq, Kaspi.kz mısıasy – klıentter men seriktesterdiń ómirin jaqsartatyn ınovasıalyq ónimder men qyzmetter jasaý. Kaspi.kz servısterin Qazaqstan men Túrkıada 25 mıllıonnan astam klıent pen 900 myń seriktes qoldanady.
Qazaqstanda bizdiń sýperqosymsha tólemder, elektrondy komersıa, onlaın sýpermarket, fınteh, saıahat, habarlandyrý, memlekettik qyzmetter men basqa da servısterdi biriktiredi. Túrkıada Kaspi.kz eldegi jetekshi elektrondy komersıa platforma - Hepsiburada-nyń 86%-yn ıelenedi.
Kaspi.kz 2024 jyldyń qańtarynan Nasdaq-ta saýdalanady.
