Holdıńke ıelik etetin Renata Kellnerova kezekti ret Chehıadaǵy eń dáýletti adamdardyń kóshin bastady dep jazady, jergilikti Forbes. Onyń baılyǵy 355,9 mıllıard cheh krony nemese 16,5 mıllıard dollarǵa baǵalanǵan. Ol sonymen qatar Forbes sarapshylary túzgen "2023 jyldyń eń aýqatty adamdary" tiziminde Renata Kellnerova 101-shi orynǵa turaqtady. Basylym jazǵandaı, 2021 jyly qapyda qaza tapqan cheh mıllıarderi Petr Kellnerdiń áýleti PPF holdıńiniń 98,9 paıyz aksıasyna ıelik etedi.
[caption id="attachment_87925" align="aligncenter" width="1379"]
Renata Kellnerova. Foto: praguemorning.cz[/caption]
Renata Kellnerovanyń PFF Group-taǵy úlesi 59 paıyz. Onyń tórt balasyna árqaısysyna 10 paıyzdan úles tıgen. Renata budan bólek 2002 jyly eldegi bilim-ǵylym salasyn damytý maqsatynda qurylǵan "Kellner qorynyń" tóraıymy. PFF tobyn marqum Petr Kellnerdiń baǵzy áriptesi jáne Forbes deregine saı Chehıadaǵy eń aýqatty 100 adamnyń qataryna kiretin Irjı Shmeıs basqarady.
Aktıvi 538 mlrd teńgeni quraıtyn Home Credit Bank PFF holdıńiniń quramyna kiredi. Banktiń jumysyn top-menedjerler arqyly Irjı Shmeıs baqylap otyrady. Qazaqstandyq Home Credit Bank - PPF úshin qundy aktıv, sondyqtan holdıń basshylyǵy onyń el naryǵyndaǵy úlesi men belsendiligin arttyrý týraly sheshim qabyldaǵan. Osy maqsatta aldaǵy eki jyldyń bederinde shaǵyn jáne orta bızneske arnalǵan sıfrlyq bank qurýǵa 20 mıllıon dollar ınvestısıa quıylmaq.
Home Credit qarjy tobynyń qurylymdary Qazaqstannan bólek Vetnam, Chehıa jáne Úndistanda ashylǵan. PPF Group-tiń quramyna Air Bank, PPF Bank, Mobi Bank, Clearbank sekildi qarjy ınstıtýttary kiredi. Holdıń sonymen qatar telekomýnıkasıa, medıa, bıotehnologıa, jyljymaıtyn múlik jáne ınjınırıń salasyndaǵy kompanıalarǵa ıelik etedi.
