Petropavl qalasynda oblystyq patrýldik politsiia batalonynyń komandiri Arman Aitievtiń júrgizýshi kýáliginen aiyrylǵan azamattardy zańsyz «qorǵashtaǵany» áshkerelendi. Bul týraly sot materialdarynda aitylǵan, dep habarlaidy Dalanews.kz
Tergeý dereginshe, 2025 jyldyń qańtarynan bastap ishimdik iship kólik basqarǵany úshin júrgizýshi quqyǵynan aiyrylǵan azamattar qala ishinde esh kedergisiz júrip-turǵan. Sebebi olarǵa politsiia batalonynyń komandiri belgili bir aqyǵa "qorǵan" bolypty.
Alǵashqy epizodta jeti jylǵa kýáliginen aiyrylǵan Andrei Bobkov máseleni Aitiev arqyly «sheshken». Baǵasy da ártúrli bolǵan: bank aýdarymymen 100 myń teńge, keiin taǵy 100 myń, al sońynda politsiia basqarmasynyń avtoturaǵynda qolma-qol 300 myń teńge tapsyrǵan. Barlyǵy - 500 myń teńge.
Keiin kóktemde dál osyndai usynyspen Denis Shilin júgingen. Bul joly «abonenttik tólem» júiesi iske qosylǵan: ai saiyn 50 myń teńge. Kóligin politsiia toqtatsa, bir qońyraý jetkilikti bolǵan. Birneshe aida 250 myń teńge jinalǵan.
Úshinshi epizodta Aitievtiń otbasy tanysy Iýrii Begliarov bar. Ol da mas kúide ustalyp, júrgizýshi kýáliginen aiyrylǵanyna qaramastan, qymbat kóliktermen qalada erkin júrgen. «Jalpy qamqorlyq» úshin 80 myń teńge tólegen.
Pogony bar «biznesmen» 2025 jyldyń qarashasynda ustaldy. Sot ony 6 jylǵa bas bostandyǵynan aiyryp, politsiia podpolkovnigi ataǵynan aiyrdy jáne memlekettik qyzmette ómir boiy jumys isteýge tyiym saldy. Memleket paidasyna 830 myń teńge tárkilendi.
Al para bergen júrgizýshiler bostandyqta qaldy, biraq júrgizýshi kýáliginsiz jáne 1,2 mln-nan 10 mln teńgege deiin aiyppul salyndy. Olarǵa da memlekettik qyzmette jumys isteýge ómir boiyna tyiym salyndy.
Úkim ázirge zańdy kúshine engen joq.
