Petropavl qalasynyń soty 33 jastaǵy Pavel Stravinskasty zergerlik buiymdardy urlap, keiin saýda ǵimaratyn qasaqana órtegeni úshin kináli dep tanydy. Ol bes jylǵa qaýipsizdigi eń joǵary túzeý mekemesine sottaldy, dep habarlaidy dalanews.kz.
Sotta aiyptalýshy órttiń ádeii qoiylmaǵanyn aityp, ǵimaratty qutqarýǵa tyrysqanyn alǵa tartqan. Alaida sot bul ýájdi qabyldamady.
Tergeý materialdaryna sáikes, oqiǵa bolǵan túni er adam tanystarymen birge ishimdik ishkennen keiin úiine jaiaý qaityp bara jatqan. Jolda zergerlik dúkenniń mańdaishasyn baiqap, urlyq jasaýǵa bel býǵan.
Ol tastyń kómegimen terezeni syndyryp, sheberhanaǵa kirip, qarańǵyda altyn syrǵalar, shynjyrlar men basqa da zergerlik buiymdardy kúrtesiniń qaltasyna salyp ketken.
Biraz ýaqyttan keiin qaita oralǵan. Óziniń aitýynsha, ishte jeke zattaryn umytyp ketkenin esine túsirgen.
Sot barysynda Pavel Stravinskas ǵimaratqa qaita kirgende elektr symdarynyń ushqyn shashyp turǵanyn kórgenin, keiin belgisiz suiyqtyq quiylǵan kanistrdi abaisyzda aýdaryp alǵan soń órt tutanyp ketkenin aitqan. Onyń sózinshe, qatty abyrjyǵan ol syrtqa júgirip shyǵyp, ótip bara jatqan adamnan órt sóndirýshiler men taksi shaqyrýdy ótingen.
Alaida kýágerlerdiń aiǵaqtary múlde basqa kórinisti kórsetti. Olardyń biri aiyptalýshyny janyp jatqan «Galaktika» saýda úiiniń janynan kórgenin aityp, onyń synǵan tereze arqyly ishke tas pen bordiýr kesekterin laqtyrǵanyn jetkizgen. Er adam muny «ózgeniń múlkin qutqarmaq boldym» dep túsindirgen.
Al tótenshe jaǵdailar qyzmetiniń sarapshylary órttiń elektr symdarynan shyqqany týraly nusqany joqqa shyǵardy. Mamandardyń qorytyndysyna sáikes, órt syrttan ákelingen tutandyrý kózinen shyqqan.
Órtten keiin ǵimarat ieleri ishke kirgende, barlyq dúnie kúlge ainalǵanyn kórgen. Jalyn qural-jabdyqtardy, stanoktardy, jihazdy, noýtbýkterdi jáne zergerlik buiymdar jasaýǵa arnalǵan materialdardy túgel joiǵan.
Zardap shekken zergerlerdiń biriniń ǵana shyǵyny 9 million teńgeden asqan.
Sot protsesi barysynda Stravinskas tek urlyq jasaǵanyn moiyndap, órtti ádeii qoiǵanyn sońyna deiin joqqa shyǵardy. Degenmen sot onyń bul ýájine senbedi.
Sot úkimimen ol bes jylǵa bas bostandyǵynan aiyryldy. Sonymen qatar sottalǵan azamattan 5 million teńgeden astam materialdyq shyǵyn óndiriletin boldy.
Ázirge úkim zańdy kúshine engen joq.
