Qaladaǵy №1 emhana basshylyǵy 8 jas dárigerdi áleýmettik turǵydan qoldaý maqsatynda aqshalai sertifikatty tabys etti. Jergilikti bilik oryndarynyń qoldaýyna emhanada eńbek etip júrgen jalpy dárigerlik praktika, balalar nevropatolog jáne dáriger-otorinolaringolog bolyp qyzmet etip júrgen jas mamandar ie boldy.
Emdeý mekemesiniń direktorynyń mindetin atqarýshy Nikolai Novikov emhanada jumys istep júrgen jas dárigerler qalada úi jaldap turatyndyqtan olarǵa qoldaý kórsetý maqsatynda aqshalai sertifikat usynylǵanyn alǵa tartty. Osylaisha emhana basshylyǵy jastardy jumysyna yntalandyryp, qoldaýda.
Qazirgi tańda Soltústik Qazaqstan oblysynda bilikti dárgigerlerge degen suranys joǵary. Kúni keshe ǵana SQO ákiminiń baspasóz qyzmeti oblystyq ákimdiktiń saitynda óńirge qajetti meditsina mamandarynyń tizimin jariia etken bolatyn.
Tizimge kóz salǵanymyzda Petropavl qalasyndaǵy densaýlyq saqtaý mekemelerine terapev, jalpy dáriger, pediatr, endokrinolog, reabilitolog, onkolog, oftalmolog, akýsher-ginekolog, kardiolog, hirýrg jáne sáýelelendirý diagnostikasy boiynsha dárigerlerdiń jetispeitinin baiqadyq. Osylaisha qazirdiń ózinde qaladaǵy 7 emhanada 100 jumys ornyna mamandar izdestirilip jatqanyn alǵa tartty.
Osyndai maman tapshy kezeńde jas dárigerlerge qoldaý kórsetip, olardyń jumysqa degen ynta-yqylasyn oiatýdyń mańyzy zor.
Ótken jyly SQO ákimi Qumar Aqsaqalov óńirdegi dárigerlerge tólenetin járemaqynyń kóterý týrasynda tapsyrma bergen bolady. Búginde ákimniń tapsyrmasy tolyqtai júzege asty desek bolady.
SQO Densaýlyq saqtaý basqarmasynyń basshysy Nurlan Aimanov ústimizdegi jyldyń basynan bastap, bul baǵyttaǵy jumystardy qarqyndy júrgizgenniń nátijesinde Soltústik Qazaqstan oblysy densaýlyq saqtaý salasyna jas mamandardy tartýda nátijeli jumystar atqarylǵanyn alǵa tartty.
