2025 jyldyń 23 qańtarynda Perizat Qairatqa qatysty múgedek-balalarǵa arnalǵan ońaltý ortalyǵyn salýǵa aqsha jinaý alaiaqtyǵy boiynsha sotqa deiingi jańadan tergeý tirkeldi, dep habarlaidy Dalanews.kz.
Perizat Qairat 2021 jyldyń qarasha aiynda Aqmola oblysynda «Batyr» qoǵamdyq birlestigine ońaltý ortalyǵyn salý úshin aqsha jinaý maqsatynda qaiyrymdylyq aýktsionyn uiymdastyrǵan.
Jurttyń senimin arttyrý úshin ońaltý ortalyǵyna muqtaj múgedek-balalar men olardyń ata-analaryn is-sharaǵa tartqan.
Perizat Qairat tarapynan taratylǵan jalǵan derekter boiynsha 48 million teńge jinalyp, quny 100 million teńge ǵimarat syiǵa tartylǵan. Alaida, aýktsion kezinde shyn máninde 22 million teńge túsken, osy aqshany ol óziniń jeke qajetine jaratqan.
Sonymen qatar, Perizat Qairat «Batyr» qoǵamdyq birlestigi úshin quny 30 million teńge jer telimin satyp alǵanyn málimdegen, alaida bul ýchastokty 2019 jyly birlestik ózi satyp alǵan.
Ońaltý ortalyǵynyń qurylysy áli bastalmaǵan qalpynda tur. Ortalyqtyń qajettiligine berildi degen ǵimarat múldem joq bolyp shyqty. Sotqa deiingi tergeý jalǵasýda. Tergeý múddesine bailanysty basqa aqparat jariialanbaidy.
Eske salaiyq, Perizat Qairat kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy degen kúdikke ilingen bolatyn. Málimetke súiensek, qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna jumsalǵan.
«Biyl kóktemde ol elordadaǵy avtosalondarda 88 mln teńgege «Mercedes-Benz S450», 80 mln teńgege «Lexus LX-600» jáne 39 mln teńgege «Haval» avtokólikterin satyp aldy. Osy kezeńde ol jalpy somasy 600 mln teńgeni quraityn elordanyń premiým sanattaǵy «Akbulak Riviera», «Highvill Ishim Gold», «Kók Jailaý» TK (turaq oryndaryn qosa alǵanda), sondai-aq «Vela Village» kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan. Bul elderde ol «Cartier» jáne «Louis Vuitton» siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan. Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Qairat óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan", - dep jazylǵan QMA málimetinde.
Artynsha QMA onyń zańsyz áreketiniń taǵy bir epizody anyqtalǵanyn habarlady.
"2023 jyldyń qarasha aiynda Perizat Qairat Palestina turǵyndaryna gýmanitarlyq kómek kórsetý úshin qarajat jinaýdy uiymdastyrdy. 2023 jylǵy jeltoqsanda osy aqsha esebinen Perizat Q. «Sensata Plaza» elitalyq kesheninen 49 mln teńgege úsh bólmeli páter jáne 30 mln teńgege «Mercedes-Benz EQE 500 4 Matic» jańa avtokóligin satyp aldy. Sonymen qatar, qarajattyń bir bóligi BAÁ-de «Rolex», «Prada» jáne «Fendi» brendtik býtikterinen zergerlik buiymdardy, saǵattar men kiimderdi satyp alýǵa jumsaldy", - dep jazylǵan habarlamada.
