BizBirgemiz qaiyrymdylyq qory saityna júktelgen sýretterin arnaiy platformadan satyp alǵan bolyp shyqty, dep habarlaidy Dalanews.kz.
KazTAG málimetinshe, qordyń basty betinde sý tasqynynan zardap shekkenderge arnalǵan 1,5 mlrd teńgeni jáne Palestina turǵyndaryna jylý retinde jinalǵan 200 mln teńgeni jymqyrdy degen kúdikke ilingen qordyń negizin qalaýshy Perizat Qairattyń sýreti kózge birden túsedi.
"Sol bette qordyń Batys Qazaqstan, Aqtóbe, Qostanai, Abai, Aqmola jáne Ulytaý oblystaryndaǵy sý tasqyny men selden zardap shekkenderge kómek uiymdastyrǵany týraly aqparat berilgen", - deidi derekkóz.
Ári qarai qor atqarǵan qaiyrymdylyq sharalary jaily baiandap, ony eki sýretpen tolyqtyrady. Birinshi sýrette sheteldikterge uqsaityn adamdar azyq-túlikti retke keltirip jatyr, al ekinshi sýrette jas qyz qorap ustap tur.
Google Chrome braýzeriniń “Google obektivimen izdeý” fýnktsiiasyn qoldanǵanda, bul sýretterdiń ártúrli saitta jariialanǵanyn baiqaýǵa bolady. Al olardyń bastapqy derekkózi Freepik platformasy ekeni anyqtaldy. Freepik –bul kásibi fotograftar men dizainerler túsirgen sýretter, illiýstratsiialar jáne basqa vizýaldyq materialdar jinalatyn arnaiy platforma.
Fotostoktarda sýretterdi avtorlar júktep, olardy belgili bir litsenziia sharttarymen paidalanýǵa usynady.
Aita keteiik, QMA eriktiler qozǵalysynyń belsendisi jáne BizBirgemizQazaqstan qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizilip jatyr.
Ol kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy dep kúdikke ilindi.
Qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna paidalanyldy.
Biyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraityn elordanyń premiým sanattaǵy "Akbulak Riviera", "Highvill Ishim Gold", "Kók Jailaý" TK (turaq oryndaryn qosa alǵanda), sondai-aq "Vela Village" kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan.
Bul elderde ol "Cartier" jáne "Louis Vuitton" siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan.
Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
16 qarasha kúni Qarjy monitoringi agenttigi Eriktiler qozǵalysynyń belsendisi Perizat Qairatqa qatysty tergeý faktisi boiynsha qosymsha aqparatty jariialady. Agenttik Perizat Qairattyń Palestinaǵa dep aqsha jinap, 200 mln teńgeden asa qarajatty jymqyrǵanyn rastady.
