Perýashev: «Qazaqstan azamattyǵyn alýshylar tarih pen qazaq tilinen synaq tapsyrsyn»
– Gýmanitarlyq jáne ekonomikalyq daǵdarystardan, azamattyq soǵystardan qashýdyń nátijesinde ekonomikalyq migranttar men bosqyndar jappai aǵylyp júr. Eýropa tájiribesi kórsetkendei, jaǵdaiy múshkil memleketterden qashyp keletin adamnyń sany artyp, migratsiialyq aǵym apatty úrdiske ainaldy. Olardy qabyldaityn elderdiń biýdjetine qosymsha shyǵyn kelip, densaýlyq saqtaý men áleýmettik qamtamasyz etýge júk túsip, jumyssyzdyq artyp, qylmystyq jaǵdai nasharlap ketýde. Onyń ústine ózge til, mádenieti jáne etnikalyq quramy jat elderden myńdaǵan migranttardyń baqylaýsyz kelýi qabyldaýshy elderdiń ulttyq biregeilikti saqtaýyna qaýip týǵyzady, – dedi Perýashev.
Depýtat óz sózinde birqatar memlekettegi bosqyndardyń qatysýymen bolǵan jantúrshigerlik oqiǵalardy mysalǵa keltirdi. Sondyqtan Eýropanyń birqatar eli syrtqy migratsiiany shekteý jóninde sharalar qabyldai bastaǵan. Depýtattyń aitýynsha, Elbasynyń beibit saiasaty men ekonomikalyq reformalardyń arqasynda Qazaqstan búgingi kúni laiyqty ómir súrýge bolatyn tartymdy memleketke ainalyp otyr.
– Sondyqtan elimiz jaqyn aimaqtardan qashqan bosqyndar úshin qyzyǵýshylyq týǵyzýy múmkin. Osyny eskerip, elimizde migratsiialyq daǵdarysty kútpei-aq, ony retteý men qazaqstandyq biregeilikti qorǵaý jóninde aldyn ala sharalardy qolǵa alý qajet dep esepteimiz. Eń aldymen, zańnamany konstitýtsiiaǵa sáikestendirý aiasynda azamattyq týraly zańda Qazaqstannyń azamattyǵyn suraýshylardyń emtihan tapsyrýy týraly normalar qarastyrylýy tiis. Atap aitqanda, respýblika Konstitýtsiiasy, Qazaqstannyń mádenieti men tarihy, memlekettik til jóninde jáne taǵy basqalary. Bul usynys eshkimge eshqandai diskriminatsiia bildirmeidi. Biraq olarǵa bizdiń halyq pen memleketti qurmetteýge týra keledi, – dep atap ótti depýtat.
Azamattyqqa quqyq alý úshin emtihan tapsyrý Avstraliia, Avstriia, Germaniia, Kanada, Niderlandy, AQSh, Izrail, Ońtústik Koreia syndy kóptegen elde bar eken. Onyń ústine mundai emtihandy tapsyrý negizinen aqyly bolǵandyqtan, biýdjetke eshqandai júk túspeidi.
Keibir memleketterde emtihandy azamattyq alǵysy kelgender ǵana emes, sonymen qatar eńbek migranttary nemese uzaq merzimge viza alýshylar da tapsyrady. Mysaly, Gollandiia men Reseide. «Onyń maqsaty tildi túsinbeý nemese qalyptasqan dástúrdi bilmeýden týyndaityn jergilikti halyqpen janjaldardy boldyrmaý. Bizdiń oiymyzsha, usynylyp otyrǵan bastama der kezindegi jáne konstitýtsiialyq reformaǵa sáikes keledi», – dep túidi sózin Perýashev.
