Senat otyrysynda baiandama jasaǵan májilis depýtaty Azat Perýashev "zań jobasyndaǵy negizgi jańalyq" quqyqtyq ortaǵa "oppozitsiia" uǵymynyń engizilýi ekenin atap ótti.
"Zań jobasynda "parlamenttik oppozitsiia" uǵymyna berilgen anyqtamada bul partiialar, ádette, bilik partiiasynan bólek ózgeshe saiasat júrgizýge mindetti degen tezis engizilgen.
Iaǵni, biz "oppozitsiiamyn" deýshilerdi parlamentte únsiz júrmei, belsendi jumys júrgizýge, qoǵam úshin shyn atsalysyp, mańyzdy problemalardy kóterýge, biliktiń saiasatyna jańa kózqarasy bolyp, bólek usynystardy berýge arnaiy itermelep otyrmyz.
Osyndai partiialarǵa, "parlamenttik oppozitsiia" ataǵymen shektelmei, sol uǵymdy mártebesi men quqyqtyq kepildikterimen tolyqtyrýdy usynyp otyrmyz" dedi Azat Perýashev.
Zań jobasy avtorlarynyń aitýynsha, qujatta oppozitsiia úshin "birqatar quqyqtyq artyqshylyqtar qarastyrylǵan". Mysaly, árbir sessiia kezinde parlamenttik tyńdaý men úkimet saǵattaryn bekitý, úkimettiń zań jobasyna balama zań jobasyn usyný, parlamenttiń kez-kelgen is-sharasyna, májilis pen senattyń birlesken otyrysynda sóz sóileý quqyǵyna ie.
Parlament depýtattarynyń bastamasymen jasalǵan "Qazaqstan parlamenti men onyń depýtattarynyń onyń mártebesi týraly konstitýtsiialyq zańǵa tolyqtyrýlar engizý týraly" zań jobasy biyl 13 aqpanda úkimet qaraýyna usynylǵan. Naýryzdyń 18-inde parlament májilisiniń qaraýyna túsken.
2019 jyly maýsymda jappai qarsylyqpen jáne myńdaǵan adamnyń qamaýǵa alynýymen ótken prezident sailaýynda jeńdi dep eseptelgen Qazaqstan prezidenti Qasym-Jomart Toqaev ulttyq qoǵamdyq senim keńesin quryp, saiasi reformalarǵa bastaityn zańdar qabyldaýǵa shaqyratynyn málimdegen.
Jaqynda Toqaev quqyq qorǵaýshylar men qoǵam belsendileri "kóz aldaý" dep baǵalap, qatań synǵa alǵan "Beibit jiyndar týraly", "Saiasi partiialar týraly", "Sailaý týraly" zańǵa qol qoiǵan.
