Kezdesýge qoǵam qairatkerleri, Qazaqstan halqy Assambleiasynyń ókilderi qatysty.
Men munda túni boiy boldym. Jastardyń bassyzdyǵyn kórip otyrmyn. Olar mektep janjalyn órshitip, jergilikti turǵyndarǵa ziian keltirdi. Men aqsaqaldar men jergilikti turǵyndardy balalardy bir-birin qurmetteýge úiretýge shaqyrǵym keledi. Ómir boiy osy jerde turasyzdar. Kórshisizder, dossyzdar, áriptessizder. Qýanysh pen qaiǵy-qasirette de birgesizder. Osy qundylyqtardyń barlyǵyn balalaryńyzǵa jetkizýlerińiz kerek, - dedi Talǵat Ómiráliev.
Sondai-aq, kezdesýde aýyl turǵyndary sóz sóilep, bir-birin qurmetteýge shaqyrdy.
Jastar – elimizdiń bolashaǵy. Biz olardyń tárbiesine barymyzdy salýymyz kerek. Biz munda beibit-yntymaqta únemi birge turyp jatyrmyz. Biraq mundai jaǵdailar bizdi búkil elge jaman jaǵynan kórsetedi. Bul – ultaralyq qaqtyǵys emes, qarapaiym buzaqylyq. Munyń bárin nieti túzý emes adamdar paidalanady. Tipti, kezdeisoq órt keshegi oqiǵanyń nátijesi siiaqty kórindi. Biraq bul olai emes. Bir-birińizdi qurmetteńizder. Biz bir jerden, bir eldenbiz. Biz bir úlken otbasymyz, - dedi Penjim aýylynyń turǵyny Aýtjan Hamraev.
Óz kezeginde Panfilov aýdandyq Politsiia bóliminiń bastyǵy atalǵan faktige sáikes, QR QK 106-baby 1-tarmaǵy boiynsha qylmystyq is qozǵalǵanyn habarlady.
Ózara sózge kelýdiń sońy mektep oqýshylary arasynda tóbeles shyqty, bul buzaqylyqqa ákelip soqty. Keibir adamdar jaǵdaidyń mánin túsinbesten, aýylda buzaqylyq jasai bastady, bul tolqýǵa ákeldi, - dedi Jandos Kavliev.
Bas dárigerdiń meditsinalyq kómek sapasyn baqylaý jónindegi orynbasary Erjan Qojahmetovtyń aitýynsha, 2005 jylǵy jasóspirim ashyq bas súiek-mi jaraqatyn, aýyr dárejedegi bas miynyń jaraqatynan keiingi sýbdýraldi gematoma, 2-3 dárejeli travmatikalyq shok alǵan. Sonymen qatar ekinshi naýqas ashyq bas súiek-mi jaraqatymen ortasha aýyrlyqta aýrýhanaǵa tústi. Qazirgi ýaqytta balanyń jaǵdaiy turaqty, jansaqtaý bóliminde em alýda, esin jinady.
27 qazanda Panfilov aýdanynyń ortalyq aýrýhanasyna Penjim kentiniń mektep aýmaǵynan dene jaraqatymen 16 jastaǵy jasóspirim tústi. Tekserý barysynda 9-10-synyp oqýshylary arasynda sózge kelýdiń arty tóbeleske ulasyp, onyń sol kezde zardap shekkeni anyqtaldy. Atalǵan faktige sáikes, QR QK 106-baby 2-bóligi boiynsha qylmystyq is tirkeldi, janjalǵa qatysýshylardyń barlyǵy anyqtaldy.
Almaty oblysynyń Densaýlyq saqtaý basqarmasy 27 qazanda Panfilov aýdanaralyq kópsalaly aýrýhanasyna túsken 2005 jylǵy oqýshynyń jalpy jaǵdaiy aýyr dep baǵalanatynyn habarlady (ol ashyq bas súiek-mi jaraqatyn aldy).
