Zertteýshilerdiń málimetinshe, Silent Lynx hakerlik toby Reseidegi munai óńdeý zaýytynyń júiesine jáne Resei qalalarynyń birindegi ákimdikke kibershabýyl jasaǵan. Reuters agenttigi bul oqiǵany Qazaqstannyń Reseige qarsy kibertyńshylyq júrgizýiniń sirek mysaly retinde sipattady, dep habarlaidy dalanews.kz.
Reuters agenttiginiń zertteýshilerge silteme jasap habarlaýynsha, biyl Silent Lynx hakerlik toby Reseidegi munai óńdeý zaýytyna shabýyl jasap, Resei qalalarynyń birindegi ákimdiktiń aqparattyq júiesin buzǵan. Zertteýshiler bul toptyń Qazaqstanda ornalasýy múmkin ekenin aitady.
Cisco kompaniiasynyń zertteýshisi Chi-en Shen men Recorded Future kiberqaýipsizdik kompaniiasynyń mamany Djýlian-Ferdinand Fogele birlesip daiyndaǵan esepte hakerlik toptyń qyzmeti taldanǵan. Mamandardyń aitýynsha, Silent Lynx buǵan deiin Ortalyq Aziia elderindegi memlekettik mekemelerdiń júielerine de shabýyl jasaǵan.
Zertteýshilerdiń dereginshe, top kóbine nysanaǵa baǵyttalǵan fishing ádisin qoldanady. Hakerler mańyzdy qujattarǵa uqsaityn faildar tirkelgen elektrondy hattar jiberedi. Eger alýshy tirkemeni ashsa, onyń qurylǵysyna ziiandy baǵdarlama ornatylýy múmkin.
Djons Hopkins ýniversitetiniń Halyqaralyq zertteýler jónindegi joǵary mektebiniń doktoranty Oleg Shakirovtyń pikirinshe, bul oqiǵa kibertyńshylyqpen tek jetekshi tehnologiialyq derjavalar ǵana ainalyspaitynyn kórsetedi.
«Basqa elder de óz múmkindikterin birtindep arttyryp keledi», – dedi ol Reuters agenttigine bergen túsiniktemesinde.
